Bu gün keçirilməli olan Milli Paralimpiya Komitəsində (MPK) prezident seçkisi təxirə salınıb.

Prosport.Az-ın əldə etdiyi məlumata görə, növbədənkənar hesabat-seçki konfransı iyulun 24-nə təxirə salınıb. Seçki Azərbaycan Dövlət Bədən Tərbiyəsi və İdman Akademiyasında keçiriləcək.

Seçkinin gec tarixə salınmasına səbəb nizamnamənin tələbləridir. Belə ki, ictimai birliklərin nizamnaməsinə əsasən, yeni seçki istefadan 1 ay sonra gerçəkləşməlidir. 

Qeyd edək ki, MPK-nin əvvəlki rəhbəri İlqar Rəhimov iyunun 23-də Beynəlxalq Görmə Məhdudiyyətli İdmançılar Assosiasiyasının (IBSA) prezidentliyinə namizədliyini əsas gətirərək istefa verib. İ.Rəhimov iyunun 29-da Portuqaliyanın Fatima şəhərində keçirilən seçkidə sözügedən qurumun prezidenti seçilib. O, IBSA-nın əvvəlki italiyan prezidenti Sandro Di Cirolamo ilə mübarizədə 27 səsdən çox toplayaraq ilk mərhələdəcə qalib olub. Onun əvvəl IBSA-da vitse-prezident olduğu post üçün isə amerikalı Co Velş seçilib. Növbəti seçki 4 il sonra keçiriləcək.

Səbuhi Musa