Premyer Liqanın debütantı "İmişli" daha bir legioneri transfer edib.

Prosport.Az-ın xəbərinə görə, bu futbolçu da Braziliyadandır və ampluaca müdafiəçidir. 

Söhbət sağ cinah müdafiəçisi Rafael Vieqasdan gedir. Tam adı Rafael Fereyra Vieqas olan 31 yaşlı futbolçunun son klubu Portuqaliyanın "San Juan di Ver" komandası olub.

Bu futbolçunun gətirilməsində "İmişli"nin yeni portuqaliyalı baş məşqçisi Jorje Kaskilyanın rolu olub. Çünki Vieqas bu ilin yanvarınadək Çexiyanın "Znoymo" komandasında onun rəhbərliyi altında çıxış edib.

Həmçinin, Rafael Vieqas ölkəsində "Real Braziliya", Portuqaliyada "Aqda", "Vizela", "Şaviş", "Salqeyruş", "Felqeyraş" və "Vilaverdensi" kimi klublarda çıxış edib. O, 2022/23 mövsümündə "Felqeyraş"da çıxış edərkən Portuqaliya Liqa 3-nün (II Liqa) ən yaxşı müdafiəçisi seçilib.

"İmişli" bu transferi, o cümlədən daha əvvəl heyətinə qatmış müdafiəçi Azər Salahlı və 30 yaşlı serbiyalı sol cinah vingeri Nikola Karaklayiçin keçidini yaxın günlərdə "İnstaqram" hesabı vasitəsilə elan edəcək.

Qeyd edək ki, "İmişli" I Liqada çıxış etmiş legionerlərindən yalnız braziliyalı mərkəz müdafiəçisi Dioqo Rollonu heyətində saxlayıb. Həmçinin, onun yanına – müdafiənin digər mərkəzinə həmyerlisi Ronaldo Rodriqes transfer edilib. Müdafiənin sol cinahında yeni transfer Azər Salahlının oynayacağını, sağında Rafael Vieqasın çıxış edəcəyini nəzərə alsaq, bölgə klubu müdafiə xətti ilə bağlı problemini həll edib.