Kişi voleybolçular arasında Azərbaycan Yüksək Liqasında finalçılar müəyyənləşib.

Prosport.Az xəbər verir ki, "Azərreyl” və " Xilasedici" kollektivlərinin görüşündə "dəmiryolçular" həlledici mərhələyə yüksəlib.

İlk yarımfinal oyununda 3:0 hesabı ilə qalib gələn "Azərreyl" cavab matçında 1:3 hesabı ilə uduzub. Bu səbəbdən cütün taleyi qızıl setdə həll olunub. Burada rəqibini (15:13) üstələyən Boris Qrebennikovun rəhbərlik etdiyi kollektiv adını finala yazdırıb.

Həlledici mərhələyə digər vəsiqəni isə "Murov Az Terminal" kollektivi əldə edib. İlk yarımfinal qarşılaşmasında "Neftçi"yə 3:0 hesabı ilə qalib gələn paytaxt təmsilçisi cavab görüşündə də eyni hesablı qələbəyə sevinib.

Beləliklə, qadın və kişi voleyboçuların Yüksək Liqasında 3-cü yer uğrunda və final oyunlarının tarixləri bəlli olub. Yüksək Liqada bürünc medal uğrunda oyunlar və final qarşılaşmaları 19, 20, 21, 22, 24, 25 aprel tarixlərində keçiriləcək.

Qadınların Yüksək Liqasında 3-cü yer uğrunda “Milli Aviasiya Akademiyası” və “Gəncə” klubları, finalda isə “Azərreyl” və “Abşeron” komandaları üz-üzə gələcək. Kişi voleybolçuların mübarizəsində isə 3-cü yer uğrunda “Neftçi” ilə “Xilasedici”, finalda isə “Azərreyl” və “Murov Az Terminal” komandaları qarşılaşacaq. 

Qeyd edək ki, 3-cü yer və final qarşılaşmalarında qalib 2 oyunun nəticəsinə əsasən müəyyən olunacaq. 2 qarşılaşmadan sonra tərəflər hərəyə 1 qələbə qazanarlarsa (xallar da bərabər olarsa), Qızıl set oynanılacaq.