1965-ci ilin avqustun 3-də Ermənistanın Qafan şəhərində keçirilmiş futbol oyununda yerli sakinlərlə azərbaycanlılar arasında dava düşüb.

Prosport.Az-ın xəbərinə görə,  Qafanın "Lernoqorts" komandası ilə Bakı "Dinamo"su arasında keçirilən görüşdə insident yaşanıb.

Qafana yaxın olduqlarından, "Dinamo"ya azarkeşlik etmək üçün sərhəd rayonu olan Zəngilandan 200-250 azarkeş də gəlib. Artıq oyunun 10-cu dəqiqəsində azarkeşlər arasında dava düşüb. 6 azərbaycanlı və 2 erməni yerli polis qüvvələri tərəfindən gözaltına alınır.

83-cü dəqiqədə "Dinamo"nun qapısına penalti verilir. Sonralar futbol şərhçisi, "Neftçi" klubunun rəisi və AFFA-nın baş katibi olacaq "Dinamo"nun qapıçısı Çingiz İsmayılov matçdan sonra baş hakimə etirazını bildirir. Bu isə erməni azarkeşlərin stadiona axışmasına və dava-dalaşa səbəb olur. "Dinamo" futbolçuları stadionu yalnız 2 saat sonra tərk edə bilir.

Məsələ o qədər böyüyür ki, insidentə hüquqi qiyməti SSRİ Prokurorluğu verir. Müsəllim Həsənovun aparıcısı olduğu verilişin həmin hadisəyə aid görüntülərini Telegram kanalımız vasitəsilə izləyə bilərsiniz.