Dünən "Neftçi" BƏƏ-nin məşhur şirkətlərindən olan "Palms Sports"la müqavilə imzaladı. Xeyirli olsun. Ümid edək ki, heç olmasa bu sponsorluqdan gələn gəlir çoxdandır ki, "Neftçi" azarkeşlərinin həsrətlə gözlədiyi yaxşı nəticələr üçün bir cığır açacaq. Əgər buradakı pullar da Rafael Qutso (Raphael Guzzo) və Robert Baua (Robert Bauer) kimi mənasız futbolçulara töküləcəksə, deməli, bu pulları da indidən havaya sovrulmuş sayaq.

Əvvəla, onu bildirək ki, sponsor hansı tanışlıq, hansı qurulmuş münasibətlə cəlb olunmasından asılı olmayaraq, hər zaman yaxşıdır. Belədə ölmüş futbolumuzun heç olmasa klub səviyyəsində inkişafı üçün ümid qığılcımı formalaşır. Dünənki müqavilə də bu qığılcımın ilk işartısını verdi.

Bəs, "Palms Sports" şirkəti nə işlə məşğuldur? 2011-ci ildə BƏƏ-nin paytaxtı Əbu-Dabidə qurulmuş şirkət əvvəlcə ölkədə ciu-citsu idmanına dəstək olmaq məqsədilə qurulub. Daha sonra fəaliyyəti genişləndirilib. Qurumun öz açıqlamasına görə, dünyanın ən böyük idman-məşq şirkəti onlardır. 20-dən çox idman proqramlarının tətbiqi ilə məşğul olan şirkətdə təxminən 200 min staj keçən şəxs var. 14 min ümumi heyəti olan şirkətdə 1000-dən artıq məşqçi də fəaliyyət göstərir. Bu şirkət azərbaycanlı idmançıların da iştirak etdiyi məşhur "UAE Warriors" MMA turnirini təşkil etməyi ilə də məşhurdur.

Görünən odur ki, adamlar həqiqətən də idmana pul yatırır, peşəkarcasına dəstək olur. Təəssüf ki, ilk gündən bunu qarşı tərəf üçün deyə bilməyəcəyik. "Neftçi" artıq şirkətin CEO və icraçı direktoru Fuad Dərvişlə bağlanacaq müqavilə imzanlama prosesində sponsoru olacağı şirkət önündə ilk səhvə yol verib. Şirkətin adında səhvə...

"Palms Sports" olub "Palms Ports". Yəni, tərəfdaşlıq bağlayan şirkətin "Palma İdmanları" anlayışı olub "Palma Limanları". 1 hərf səhvidir deyib keçməyin. Görürsünüzmü, 1 hərf 14 illik şirkətin ad və mahiyyətini necə dəyişdi. Lakin bizə bəllidir ki, şirkət dənizçilik yox, idman orientasiyalıdır.

Vaxtı ilə Parisi "partladan" dərvişlərimiz olub. İndi isə ərəb Dərvişin özünü elə Bakıdaca "partlatdılar".

Əziz