Sloveniyanın "Maribor" klubunun futbol direktoru Markus Tavarisin Bakıya gəlişinin səbəbi bilinib.

Bakıda səfərdə olan braziliyalı 13 dekabrda "Sərhədçi" İdman Mərkəzində AFFA Gənclər Liqası (U-19) çərçivəsində keçirilən "Qarabağ" – "Turan Tovuz" oyununu (6:1) izləyib.

Uzun illər (2008-2022-ci ildə Sloveniya çempionatında 436 oyuna 159 qol vurub) "Maribor" formasını geyinmiş, karyerasını orada bitirmiş və həmin klubun əfsanəvi veteranlarından birinə çevrilmiş 40 yaşlı funksioner "Qarabağ" Akademiyasının koordinatoru Aftandil Hacıyev və meneceri Nail Kərimovla, eləcə də məşqçilər korpusu ilə görüşüb. Görüş zamanı 2 ölkənin uşaq futbolu arasında paralellər aparılıb, əməkdaşlıq təklifi irəli sürülüb. Akademiya heyəti və futbolçuların qarşılıqlı təcrübə mübadiləsi proqramlarında iştirak etmələrinin mümkünlüyü və faydaları müzakirə olunub.

Qeyd edək ki, Markus Tavares Nail Kərimovla birlikdə Avropa Klublar Assosiasiyasının (ECA) Uşaq-gənclər futbolunun inkişafı üzrə İşçi Qrupunun üzvüdür.

Prosport.Az-ın əldə etdiyi xəbərə görə isə, onun bura gəlişi "Qəbələ"nin sabiq futbolçusu, hazırda "Araz-Naxçıvan"da oynayan həmyerlisi Felipi Santusa görədir. Santus 2018-2021-ci illərdə "Keşlə"yə keçənədək məhz "Maribor"da oynayıb. Onlar Sloveniya nəhəngində 3 il komanda yoldaşı olub. Məhz Markus Tavaris dünən Azərbaycan Premyer Liqasının Mərdəkanda keçirilən "Araz-Naxçıvan" – "Sabah" (0:1) oyununu dostuna görə stadiondan izləyib.

Felipi Santus dostuna "Araz-Naxçıvan"ın formasını hədiyyə edib. Həmçinin, onlar həyat yoldaşları ilə birgə noyabrın 8-də açılmış Bakıdakı Zəfər Parkına, Xocalı abidəsinə baş çəkib, Heydər Əliyev Mərkəzində olub, İçərişəhəri gəziblər.

Sonda bu gün günorta saatlarında Azərbaycanı tərk edəcək Markus Tavarislə bağlı daha bir məqamı qeyd edək. O, "Qəbələ" azarkeşlərinə yaxşı tanışdır. Çünki 2016-cı ildə bu 2 komanda UEFA Avropa Liqasının pley-off mərhələsində qarşılaşarkən hər iki oyunda qol vurmağı bacarıb. Mərdəkandakı "Dalğa Arena"da dünən funksioner kimi oyun izləmiş Tavaris 8 il əvvəl futbolçu kimi "Qəbələ" ilə matçın 18-ci dəqiqəsində hesabı açmışdı. Lakin sonda "Qəbələ" 3:1 qalib gəlmişdi. 1 həftə sonra isə Sloveniyadakı cavab oyununda sambaçı forvard 67-ci dəqiqədə qələbə qolunu vurmuşdu. Lakin onun bu qolu "Qəbələ"nin qrup mərhələsinə vəsiqə qazanmasına mane ola bilməmişdi.

Səbuhi Musa