21 yaşadək futbol millimizin (U-21) baş məşqçisi Samir Əliyev istefaya göndərilib.

Prosport.Az-ın əldə etdiyi xəbərə görə, Avropa çempionatının seçmə mərhələsində Lüksemburqun yer aldığı F qrupunda 3 xalla sonuncu olması, xüsusən Şimali İrlandiya və İngiltərəyə böyükhesablı məğlubiyyətlər (müvafiq olaraq 0:5 və 0:7) 45 yaşlı məşqçi ilə yolların ayrılmasına səbəb olub.

Bu ay Belarusun paytaxtı Minskdə baş tutmalı olan təlim-məşq toplanışının, 16 və 19 noyabrda yerli U-21 komandası ilə yoxlama matçlarının ləğvinin əsasında da bu durur. Belarus Futbol Federasiyaları Assosiasiyası ləğvin onlardan qaynaqlanmadığını, bu matçların əvəzində noyabrın 17-də BATE ilə yoxlama oyunu keçirəcəklərini açıqlayıb. Məşqçinin müqaviləsi dekabrda bitsə də, ona indidən "yaxşı yol" deyilib.

AFFA isə bu toplanışın gələn il keçiriləcəyini açıqlayıb. Təbii ki, yeni baş məşqçinin rəhbərliyi altında...

Qeyd edək ki, 2022-ci ildən U-21 millimizi çalışdıran Samir Əliyevin köməkçilərindən biri yığmamızın və "Qarabağ"ın sabiq futbolçusu Emin İmaməliyevdir. Hər iki məşqçini müsahibəyə razı salmağa çalışsaq da, danışmaq istəmədiklərini bildirdi.

Onu da bildirək ki, sentyabrın 13-də AFFA İcraiyyə Komitəsi aşağı yaş qrupları üzrə millilərin baş məşqçiləri Aqil Nəbiyev (U-16), İlham Yadullayev (U-17), Füzuli Məmmədov (U-18) və Elxan Abdullayevin (U-19) müqavilə müddətinin 2025-ci il yanvarın 1-dək uzadılmasını qərara alıb. Xüsusən, İ.Yadullayev və E.Abdullayevin işi barədə yekun qərar Avropa çempionatının seçmə mərhələsindən sonra veriləcək.