Azərbaycan Basketbol Liqasının debütantı və B qrupunun lideri "Ordu" klubunun ev oyunlarını əvvəldən nəzərdə tutulduğu kimi, Hövsan qəsəbəsindəki "FHN Arena"da keçirə bilməməsinin səbəbi bilinib.

Prosport.Az-a Azərbaycan Basketbol Federasiyasının icraçı vitse-prezidenti Fərrux Mahmudovun verdiyi məlumata görə, buna səbəb orada voleybol yarışlarının keçirilməsidir:

"Fövqəladə Hallar Nazirliyi voleybol komandası ("Xilasedici" kişi voleybol komandasından söhbət gedir – red.) yaradıb. Yerə terafleks səriblər. Bu səbəbdən də arena basketbol üçün uyğun deyil".

Qeyd edək ki, MOİK-ə məxsus olan "Ordu" klubu ev oyunlarını Bakı İdman Sarayında keçirəcək. İspaniyalı Alberto Blankonun yetirmələri ilk ev matçını II tur çərçivəsində oktyabrın 26-da "Şəki"yə qarşı keçirəcək. Həmin matç saat 12:30-da start götürəcək.

Xatırladaq ki, Bakı İdman Sarayından bu mövsümdən "Sabah", "Neftçi" və NTD klubları da ev oyunu kimi istifadə edir.