Bəzən adam aşağı yaş qruplarında bu nəticələrə baxanda düşünürsən ki, yox e, Santuşun millisi tənqidə layiq deyil. Bilirəm, indi Samir Əliyevi danışdırsan, deyəcək ki, İngiltərə son Avropa çempionudur, "Mançester Siti", "Liverpul"da oynayan futbolçuları var, bağ belə, bostan belə. Bəs yaxşı bu Avropa çempionlarına adam balası kimi uduzmaq olmazdı? Bəs Şimali İrlandiyaya 0:5-i kimin ayağına yazaq?
Belə müqayisələri hər nə qədər xoşlamasam da, ancaq statistika adamın gözünə girir. Gürcüstan millisi artıq gələn il Slovakiyada keçiriləcək Avropa çempionatının bir addımlığındadır. Gürcülər sözün həqiqi mənasında əsl partlayış edirlər. Əsas komanda Avropa çempionatına çıxanda bunu xaricdə oynayan legionerlərlə əlaqələndirirdilər. Bəs U-21? Adamlar işi düzgün qurublar, bunun başqa adı yoxdur. Hələ növbəti AVRO-2028-də Gürcüstanı görsək, təəccüblənməyin.
...İngiltərə ilə oyuna baxdım. Musa Qurbanlının 1 zərbəsindən başqa, düşünülmüş hücum görmədim. Şimali İrlandiya ilə oyunda legioner qapıçı Rüstəm Samiqullin tənqid olundu. Dünən oyuna çıxan Xəyal Fərzullayevin topu tutmaq istəyərkən Samiqullindən betər səhv etdiyiini gördükdə, düşünürsən ki, hamısı eynidir, ha azərbaycanlısı, ha legioneri... Bu, əvvəlki rəhbərliyin etdiyi nöqsanların nəticəsidir. İndi artıq yavaş-yavaş gəlir çıxır qarşımıza. U-15-dən əsas milliyə kimi rüsvayçı nəticələrin olması bəlkə də indiki durumda xeyrimizədir. Çünki silkələnmək üçün vaxtdır. Düzdür, hələ bir neçə il də belə aşağı yaş qrupu olan, belə bazası olan Azərbaycanın əsas millisindən nəsə gözləmək faydasızdır. Fernandu Santuş hər nə qədər hər oyundan bir kapitanları dəyişsə də, hər nə qədər "bir neçə ilə yaxşı Azərbaycan millisi görəcəksiniz" desə də...
İndi klubların akademiyalarına nəzarət gücləndirilməlidir. Aşkar rəqabətsiz çempionatlara əl gəzdirilməli, çıxış etmək xətrinə valideynlərdən pul alıb çempionata komanda buraxan özəl "akademiya"lar yarışa buraxılmamalıdır. Valideynləri şirnikləndirərək adına akademiya qoşan komandalara nəzarət edilməlidir. Adlarını European Football Academy, Universal Football Academy qoyub, ancaq akademiya ilə yaxından-uzaqdan əlaqəsi olmayan, adi bazaya sahib olmayan komandalar üçün lazım gəlsə, ayrıca çempionat təşkil edilməlidir. Ölkənin aparıcı klubu "Qarabağ" neçə ildir ki, akademiya üçün baza tapa bilmir. Bu məsələyə artıq dövlət səviyyəsində dəstək olunmalıdır. Uşaqlara "ayə, korsan?" deyən məşqçilər təftiş olunmalı, onların futbol biliyi sertifikasiyadan keçirilməlidir. Aşağı liqalarda hakimlərin səviyyəsi yoxlanılmalı, adi protokol doldura bilməyən hakimlər uzaqlaşdırılmalıdır.
Belə olarsa, bəlkə 5 ilə Azərbaycanda futbolun yaşayacağına inamımız olacaq...
Səbuhi Musa
P.S. Bir də qeyd etmək yadımdan çıxdı. Biz ancaq minifutbol və ya çimərlik futbolunda İngiltərəni məğlub edə bilərik. Dünən ingilislər qolları bizə saydıranda məlum oldu ki, "Azərsun"un minifutbol komandası rumınlara Antalyada qalib gələrək Avropa çempionu olub.