AFFA İntizam Komitəsinin tərkibi dəyişdirilir.

Prosport.Az-ın əldə etdiyi məlumata görə, "CBC Sport"un şərhçisi, "Xəzər Lənkəran" klubunun sabiq hüquqşünası Ramil Cahangirov Komitədən öz istəyi ilə çıxıb.

Buna səbəb R.Cahangirovun Dövlət Şəhərsalma və Arxitektura Komitəsində İşğaldan azad olunmuş ərazilərdə layihələrin idarə edilməsi şöbəsinin müdiri işləməsi, daha çox Qarabağ bölgəsində olmasıdır. O bu səbəbdən Bakıdakı iclaslara qatıla bilmədiyini və İntizam Komitəsindən ayrılmaq istədiyini bildirib.

AFFA İcraiyyə Komitəsinin bu gün saat 15:00-da başlamış iclasında məhz onun yerinə yeni üzv müəyyənləşəcək. Bu, ötən ildən İntizam Komitəsində səs hüququ olmayan, İntizam üzrə müfəttiş (İntizam Komitəsi üzvlərinin verdiyi qərarların qanunvericiliyə uyğun olub-olmadığını yoxlayan şəxs) işləyən Namiq Əliyevdir. O, İntizam Komitəsinin sədri Erkin Hüseynovun müavini təyin olunacaq.

İntizam üzrə müfəttiş vəzifəsinə isə 3 nəfər namizəddir. Bunlardan 2-si AFFA-nın hüquqşünasıdırsa, 1-i kənar yerdəndir.

Qeyd edək ki, ötən il martın 7-də keçirilmiş AFFA İcraiyyə Komitəsinin iclasından sonra İntizam Komitəsində Erkin Hüseynov sədr, PFL-in vitse-prezidenti Aslan Şahgəldiyev, əməkdaşı Məlik Həsənov, AFFA rəsmiləri – Qabil Nəcəfov, Elçin Məmmədov, hüquqşünas Ramil Cahangirov və Hakimlər Komitəsinin üzvü Ömər Paşayev üzv seçilib. İntizam Komitəsində səs hüququ olmayanlar kimi isə Namiq Əliyev (İntizam üzrə müfəttiş), Müzəffər Müzəffərli (PFL-in əməkdaşı) və Rəna Əsədova (AFFA-nın əməkdaşı) təyin olunub.

Vasif