Gənclər və idman nazirinin sabiq müavini Asif Əsgərov millət vəkili seçilənlər arasında ən yüksək səsi toplayan namizəd olub.

Prosport.Az-ın xəbərinə görə, bu barədə Mərkəzi Seçki Komissiyası nəticələri açıqlayıb. Belə ki, Naxçıvanda doğulmuş 58 yaşlı A.Əsgərov 112 saylı Zaqatala seçki dairəsindən 12 942 səs toplayıb. Bu da həmin dairə üzrə səslərin 79,7%-ni qazanmaq deməkdir.

A.Əsgərov 1989-cu ildə Azərbaycan Dövlət Bədən Tərbiyəsi İnstitunu (indiki Azərbaycan İdman Akademiyası) bitirib. Həmin ildən RÜOEUGİM-də təlimatçı-metodist-məşqçi, 1991-ci ildən həmin məktəbin direktoru işləyib. 1994-cü ildən "Attila" idman klubunun sədri, cüdo üzrə Azərbaycan yığma komandasının rəisi və Azərbaycan Cüdo Federasiyasının I vitse-prezidenti olub. 

Daha sonra o, 1996-cı ildən Gənclər, İdman və Turizm Nazirliyində (indiki Gənclər və İdman Nazirliyi) idarə rəisi, Baş idarə rəisi işləyib. 2000-2006-cı illərdə həmin qurumda nazir müavini (həmin vaxt Əbülfəz Qarayev nazir idi) olub.

Hakim Yeni Azərbaycan Partiyasının üzvü olan Asif Əsgərov daha sonra Zaqatala (2006-2009), Səbail (2009-2015) və Nəsimi rayonlarında (2015-indiyədək) icra hakimiyyətinin başçısı təyin olunub. Onun deputat seçilməsi isə o deməkdir ki, ölkə başçısının sərəncamı ilə o, icra hakimiyyəti başçısı vəzifəsindən ayrılacaq.

Onu da bildirək ki, Asif Əsgərov həm də Azərbaycan Cüdo Federasiyasının İcraiyyə Komitəsinin üzvlərindən biridir.

Qeyd edək ki, idman aləmindən Azərbaycan Karate Federasiyasının prezidenti Ülvi Quliyev də 5-ci dəfə millət vəkili seçilib. 57 yaşlı federasiya prezidenti bitərəf namizəd kimi 15 saylı Yasamal I seçki dairəsində 55,5%-lə qalib elan edilib.

Səbuhi Musa