"Azərbaycana mənə bu şansı yaratdığı üçün təşəkkürümü bildirirəm. Bu medal mənim üçün qızıla bərabərdir. Azərbaycan Güləş Federasiyasına, məşqçilərimizə, həkim və masajçımıza, sparrinqlərimə minnətdaram. Hər kəsə "çox sağ ol" deyirəm. Biz bir komandayıq, bir ailəyik".

Prosport.Az xəbər verir ki, bunu Paris Olimpiadasında bürünc medal qazanmış Georgi Meşvildişvili deyib.

Gürcü idmançı Azərbaycanda özünü yad hiss etmədiyini bildirib: "Azərbaycanı öz doğma vətənim sayıram. Orada özümü qonaq kimi hiss etmirəm. Yarımfinalda məğlub olduğum Qeno Petriaşvili çox güclü idmançıdır. Bunu finalda da göstərdi. Onu da təbrik edirəm. Bu dəfə bürünc medal qazandım. Artıq indidən növbəti yarışa çıxmağı səbirsizliklə gözləyirəm. Özümü buna tam kökləmişəm".

Qeyd edək ki, o, bürünc medal görüşündə Robert Barana (Polşa) 9:3 qalib gələrək Azərbaycana 6-cı medalı qazandırıb.