Cüdoçu Zelim Kotsoyevin Paris Olimpiadasında ölkəmizə növbəti qızılı qazandırmasından sonra Azərbaycan medal sıralamasında 9 pillə irəliləyib.

Prosport.Az-ın xəbərinə görə, bu nailiyyətdən sonra Azərbaycan 24-cü sıradan 15-ci yerə yüksəlib.

Medal sıralamasında boksçumuz Loren Alfonsonun medalının əyarı tam dəqiqləşmədiyindən, o, sıralamada yer almır. Hazırda sıralamada yalnız cüdoçular – Hidayət Heydərov və Zelim Kotsoyevin medalları nəzərə alınıb.

Hazırda Çin 11 qızıl, 7 gümüş və 6 bürünc medalla ilk sıradadır. Ən çox medal qazanan ABŞ 2-cidir (9-15-13). Meydan sahibi Fransa 3-cüdür (8-11-8). Azərbaycandan öndə olan digər ölkələr Avstraliya, Yaponiya, Böyük Britaniya, Cənubi Koreya, İtaliya, Kanada, Almaniya, Niderland, Yeni Zelandiya, Rumıniya və Honkonqdur.

Qeyd edək ki, Olimpiadalar tarixində Azərbaycanın indiyədək medal sıralamasında ən yaxşı göstəricisi 32-ci yer olub. Bu, 2012-ci ildə London Olimpiadasında qeydə alınıb.

Səbuhi Musa