Mən boks üzrə yığmamızın böyük məşqçisi Nəriman Abdullayevi tanıyandan o, hakimlikdən şikayətlənir. Adam illərdir ki, tutduğu postdakı uğursuzluğu sığortalamaq üçün hakimləri günahlandırır. İnanmırsınız?

Onun son illər verdiyi açıqlamalardan bəzilərini təqdim edirəm:

Serbiyadakı Avropa çempionatı barədə (26.04.2024): "Müəyyən vaxtlarda hakim ədalətsizliyi idmançılarımızın məğlubiyyətinə səbəb oldu... Tayfur Əliyevə qarşı hakim haqsızlığının olduğunu söyləyə bilərəm... Lakin yenə hakimlərin qeyri-müəyyən qərarları idmançımızı finaldan etdi və nəticədə Malik Həsənov bürünc mükafatla kifayətləndi".

İtaliyadakı lisenziya turniri barədə (11.03.2024): "Uduzduğumuz qarşılaşmalara baxsaq, Tayfur Əliyevin döyüşündə hakim qərarından narazı qaldıq".

Özbəkistandakı dünya çempionatı barədə (15.05.2023): “Bir neçə döyüşdə problemlə üzləşdik, hakimlərin səhvi oldu... Hakimlər arasında o qədər dəyişikliklər olur, yeniliklər edilir ki, bəzi döyüşlərdə üstünlük bizə verilmişdi. Yarış vaxtı 2 münsif əyləşir. Əlavə hakimlər isə nəticəni dəyişə bilər. Məsələn, Nicat Hüseynovun döyüşündə qələbəni ona vermişdilər. Sadəcə, həmin 2 hakim qərarı dəyişdi”.

Rumıniyadakı U-22 Avropa çempionatı barədə (02.04.2018): “56 kq çəki dərəcəsində final döyüşündə Tayfur Əliyev Rumıniya boksçusu Robert Jitaru üzərində təmiz qələbə qazandı və hesab edirəm ki, qalibiyyət bizim olmalı idi. Siz özünüz də şahidi oldunuz ki, finala vəsiqə qazanan bütün rumın boksçular hamısı məğlubiyyətlə üzləşdi. Son qızıl ümidləri isə Robert Jitaruya idi. Doğma divarlar arasında keçirilən yarışda rumınlar çalışırdı ki, 1 qızıl medal əldə etsinlər. Ona görə də bizim döyüş çox gərgin keçdi. Misal üçün deyim ki, vurulan zərbələrdən də görünürdü ki, “açıq” idi və hakimlər onun tərəfini saxlayırdı. Hesab edirəm ki, Avropa çempionatı Rumıniyada yox, başqa ölkədə təşkil olunsaydı, final döyüşünün qalibi Tayfur olardı. Çünki açıq-aydın görünürdü ki, 1 və 3-cü raundlarda Tayfur rəqib üzərində təmiz qələbə çaldı. Hesab edirəm ki, bu qələbə bizim olmalı idi... Boksçularımızın döyüşlərinin videoyazılarına sonradan baxan zaman hakimlərin qərəzli mövqeyi və 3:2 hesabı ilə bizim idmançıları uduzdurmalarının şahidi oluruq. Bizim hardasa 4 medalımız olmalı idi".

Qardaş, bu Tayfur Əliyev hər dəfə uduzanda niyə hakim səhvi və ya qərəzi olur, mən başa düşə bilmirəm. Hakimlərin Tayfurdan çəkindiyi nədir? Ümumiyyətlə, sovet psixologiyasından qalma yanaşmanı çıxarıb atmaq lazımdır. O vaxt uduzanda deyirdilər ki, imperialist qüvvələr sovetlər ölkəsini gözü götürmür. Azərbaycanda isə hələ SSRİ daxilində uduzanda deyirdilər ki, müsəlmanıq, azərbaycanlıyıq, təbii ki, rusu, gürcünü, ermənini qoyub bizi qalib etməyəcəkdilər ki? Müsəlmanlığın nə dəxli? Avropada heç kim "müsəlman", "xristian" yanaşmasına görə idmana yanaşmır. Cəmiyyətin digər sahələrində bu diskriminasiya ola bilər, ancaq idmanda yox! Yəni, bunu etmək avropalı və ya xristian hakimə nə verir ki?

Boksda hakim səhvi var, olub və olacaq. Ancaq bunun hər zaman məhz bizimkilərə qarşı edildiyini iddia etmək belə təcrübəli məşqçiyə yaraşmır. Bu, kubalı baş məşqçi Pedro Rokenin ayıbını örtməkdir. Bir dəfə Xətai metrostansiyasının yanındakı bankda pulunu Kubaya göndərməyə çalışan məşqçini görmüşdüm. Həyəcanlı idi, pulunu göndərə bilmirdi. Səbəbi vardı. Çünki Azərbaycanda aldığı maaş onun Kubadakı nəsli üçün bəs edər dərəcədədir.

Peşəkar boks veteranımız Fariz Məmmədov demişkən, "Kubada olimpiya medalı vermədiyi üçün qovulan" bu məşqçini Azərbaycanda saxlamaq kimin marağındadır? Veteranlara, qazilərə ayrılmalı olan pullar (federasiya prezidenti əmək və əhalinin sosial müdafiə naziri Sahil Babayevdir – red.) bəlkə elə Pedro Rokenin cibinə gedir?

Səbuhi Musa

P.S. Avropa çempionatı sabah bitsə də, bizim üçün erkən başa çatıb. Yenə yerli boksçumuz Avropa çempionu ola bilmədi.