"Qarabağ" UEFA Avropa Liqasının 1/8 final mərhələsinin ilk oyununda Bakıda "Bayer"lə 2:2 hesablı heç-heçə edib.

Prosport.Az xəbər verir ki, Ağdam təmsilçisinin yarımmüdafiəçisi Patrik Andrade matçdan sonra jurnalistlərin suallarını cavablandırıb:

– Oyunu necə dəyərləndirirsiniz?
– Oyuna yaxşı başladıq. İlk hissənin məntiqi nəticəsi kimi hesabda önə keçdik. Rəqib 2-ci yarıda hesabı bərabərləşdirməyi bacardı. Bu, sanki ağızda acı dad təəssüratı yaratdı.

– Üstünlüyü qorumaq üçün nə çatmadı?
– Bu, futboldur. Meydanda özümüz özümüzlə oynamırıq. Rəqib 2-ci yarıda çoxlu qol epizodları yaratdı. Xüsusilə oyunun sonlarına yaxın. Bunun nəticəsində hesabı bərabərləşdirdilər.

– Üstünlüyü əldən verdiniz. "Qarabağ" bu nəticəyə layiq idi?
– İstənilən halda 2 top fərqli üstünlüyü əldən vermək məyusedicidir. Amma başımızı dik tutmalıyıq. Qarşıda "Zirə" ilə oyun var. Yaxşı hazırlaşmalıyıq. 

– Cavab matçında belə oynamaq olar?
– Bilmək olmaz. Futbolda əvvəlcədən nəsə demək olmur. Hələ "Zirə" ilə oyuna köklənməliyik. Daha sonra "Bayer"lə cavab görüşünə hazırlaşacağıq.