Azərbaycan cüdo millisi Avstriyanın Lints şəhərində keçirilən Qran Pri turnirini 3 medalla başa vurub.

Prosport.Az xəbər verir ki, yarışa 12 idmançı ilə yollanan komandamız 2 gümüş və 1 bürünc medalla kifayətlənib.

Son gündə 90 kq çəki dərəcəsində 2 cüdoçumuz mübarizəyə qoşulub. Elcan Hacıyev ilk görüşünə 1/16 finalda çıxıb və belçikalı Karel Fubertə məğlub olub.

Murad Fətiyev də yarışa 1/16 finaldan qoşulub. 24 yaşlı idmançı ispaniyalı Daniel Trinidaddan güclü olsa da, növbəti mərhələdə büdrəyib. Fətiyev Avstriya təmsilçisi Tomas Şarfeterə uduzub.

Qeyd edək ki, Qran Prinin ilk 2 günündə Kamran Süleymanov (66 kq) və Rəşid Məmmədəliyev (73 kq) gümüş, Gültac Məmmədəliyeva (52 kq) isə bürünc medal əldə ediblər.