Cüdo üzrə böyüklərdən ibarət Azərbaycan milli komandasının Bosniya və Herseqovinanın İstoçno Sarayevo (Şərqi Sarayevo bu ölkə daxilində muxtar qurum kimi fəaliyyət göstərən Serb Respublikasının de yure paytaxtıdır), gənclərdən ibarət millimizin isə İspaniyanın Malaqa şəhərində keçiriləcək Avropa Kuboku üçün heyəti açıqlanıb.

Federasiyadan Prosport.Az-a verilən məlumata görə, hər iki yarışda kişi cüdoçular mübarizə aparacaq. Böyüklərin yarışında 13 idmançı Azərbaycanı təmsil edəcək. Yarışda Azərbaycanın ehtiyat cüdo qüvvəsi mübarizə aparacaq.

Rövşən Əliyev (60 kq), Tofiq Əliyev, Ruslan Paşayev, Kamran Süleymanov (hamısı 66 kq), İbrahim Əliyev, Telman Vəliyev (hər ikisi 73 kq), Kərim Allahverdiyev, Məhərrəm İmamverdiyev (hər ikisi 81 kq), İbrahim Ağakişiyev, Musa Hüseynli (hər ikisi 90 kq), Aslan Mirzəyev, Adil Kərimli və Ruslan Nəsirli (hamısı 100 kq) tatami üzərinə çıxacaq.

Gənclərdən ibarət Azərbaycan yığması isə İspaniyanın Malaqa şəhərində təşkil olunacaq analoji yarışa 17 cüdoçu ilə yollanıb. Turnirdə Nizami İmranov, Nurlan Kərimli, Əli Hacıyev, Eltun İmranov, Murad Muradlı (hamısı 60 kq), Samir Piriyev, İslam Rəhimov, Aydın Rzayev, Nicat Nağıyev (hamısı 66 kq), Süleyman Əliyev, Qadir Hüseynov, Vüsal Qələndərzadə (hamısı 73 kq), Ömər Rəcəbli, Xəyyam Əliyev (hər ikisi 81 kq), Əjdər Bağırov, İsmayıl Zamanov (hər ikisi 90 kq) və Kənan Nəsibov (+100 kq) qüvvəsini sınayacaq.

Qeyd edək ki, 20-21 mayda keçiriləcək yarışlarda Azərbaycan Cüdo Federasiyasının "B" kateqoriyalı beynəlxalq dərəcəli hakimləri Akif Tahirov və Bəhriyyə Hüseynova ədalət təmsilçiləri arasında yer alacaqlar.