Səbuhi Sadiq yazır...

"Neftçi" PFK-da çalışan hər kəsə aiddir bu yazıda olan sözlər... 

Bir klub ki öz azarkeşinin başını digərlərinin yanında aşağı edir, o klubdan nə azarkeşinə, nə ölkəsinə, nə də özünə xeyir gələr. Başı aşağı olmaq deyəndə, təkcə klubun uduzmasını nəzərdə tutmuram. Komanda uduzar da, udar da. Məsələ filmdə deyildiyi kimi, "vnimatelnı" olmaqdadır. 

Klubun rəhbərliyindən tutmuş, sosial media işçilərinə kimi hər kəs azarkeşlərlə məzələnməklə məşğuldur. Biz "Neftçi"nin bundan daha pis vəziyyətdə olduğunu da görmüşük. "Qəbələ" bizə qol şousu göstərəndə əsəbimizdən hər şeyi dağıtmışıq, 9 il "Qarabağ"ın bizim qarşımızda kubok qaldırdığını görəndə içdən-içə ağlamışıq. Amma builki kimi bizimlə məzələnən heç olmamışdı. Hər şeyi dəyişirsiniz, amma beyninizi dəyişmirsiniz. Hansı ki düşünən məhz o beyindir. 

Belə nəticələr əldə edən klubun məşqçisi mərd adam olsaydı, çıxıb deyərdi ki, bağışlayın, mən bacarmadım, sağ olun. Amma Mutu deyir ki, vaxt lazımdır, böyük proyektimiz var və s. 

Sosial media "Sabah"ı zəif görüb, biabırçı post paylaşır ki, bəs sabah olmayacaq. Ay qardaş, sən öz klubunun gücünə bu qədər əminsən ki, belə şey paylaşıb, sonra cavab gəlməyəcəyini düşünürsən?! Rəqib klubun "korvalol" paylaşımı ürəyimizə ox kimi girdi. Bunu heçmi düşünmədiniz? Heçmi azarkeşlərinizin başı aşağı olacağını düşünmədiniz? Bu klubun azarkeşlərinə hörmətsizlik etmək bu qədərmi asandır? 

Kluba yeni rəhbərlik gələndə, azca da olsa sevinmişdik. Amma indi bütün bunlardan siz məsulsunuz. Papağınızı qoyun qabağınıza fikirləşin, "korvalol", yoxsa "valerian"? Azarkeşlər hansından istifadə etsin? Oyun haqqında fikirləşməyin, onsuz da oyunu fikirləşən tək BİZİK!