Xatırlayırsızsa, yaxınlarda Bakı Şəhər Halqasına media işlərində köməklik göstərən "Synergy" haqda yazı yazmışdım. İndi növbə Halqadadır. Mətbuatı halqasına salan şirkətdə... Bu onların dili ilə desəm, Part II sayıla bilər. 

Düz 10 gün gözlədim. Hər hansısa izahat, hər hansısa üzr gözlədim Bakı Şəhər Halqasından. Məsələn, keçmişdə olan əməkdaşlığımıza sayğı ilə yanaşıb deyə bilərdilər ki, sizə akkreditasiya verilməməsinə görə üzr istəyirik, səbəblər bizdən asılı deyil və s. Necə ki, təxminən oxşar problemə görə digər bir federasiyanın mətbuat katibi həmin üzrü istəmiş və bunu normal qarşılamışdıq. Əgər ölkə idmanınının (futboldan kənar) incəliklərini bilib işıqlandıran 5 idman saytından biri (buna iddia edirəm və iddiamı da hamıya sübut etməyə hazıram) olan Prosport.Az saytına izahat vermək və ya üzr istəmək kimi üzlər sizdə yoxdursa, o zaman bu yazını oxumaq sizin tam haqqınızdır. Bu müddətdə dövlətin pulu ilə əyləndiniz, kef məclisi qurdunuz, yediklərinizi həzm etdinizsə, tənqid payını götürmək indi sizin nəsibinizdir. Yeni şüarınızda olduğu kimi: "Gözləmədiyinizi gözləyin!" (Expect Unpexpected).

Başlayaq Milli Mətbuat katibi olan Turab Teymurovdan. Ayan Ağaların gedişindən sonra əvvəl işlədiyim ictimai-siyasi saytda bu təyinatı ilk olaraq mən ictimaiyyətə çatdırmışdım. Düzdür, ilk vaxtlar bu, təkzib olunsa da, gec-tez – bir neçə ay sonra mən deyənə gəldilər və təyinat açıqlandı. Bir müddət sonra Teymurov köməkçiləri vasitəsilə müraciət edərək mənə geniş müsahibə vermək istədiyini bildirdi. Təbii ki, onadək "Formula 1" haqda hər şey artıq mətbuatda bəlli idi və müsahibə PR xarakterli, bir növ onun ictimaiyyətə tanınması üçün olmalıydı. Belə şeyləri xoşlamasam da, könülsüz şəkildə razılıq verdim və müsahibə çıxdı. 

Mən bunları niyə görə dedim? Çünki həmin müsahibə Bakı Şəhər Halqasının saytında istinad mədəniyyəti olmadan paylaşıldı. Mətbuat sahəsində işləyən şəxsin bu normalara əməl etməsi bir qanundur, əməl edilməməsi mədəniyyətsizlikdir. Demək ki, hansısa şirkətin media departamentində işləmək hələ onun mətbuatın "M" hərfindən xəbəri olmasından məlumat vermir. 2 dəfə iraddan sonra bunun düzəldiləcəyi vədi verildi, amma yerinə yetirilmədi. Demək ki, adam öz işçilərinə də söz keçirə bilmir. Adamın vəzifəsinin adında "Milli" sözü var. Amma milli jurnalistlərə akkreditasiya verilməsinə heç bir köməklik göstərə bilmir, əvəzində İvana Knöll kimi Qətərdə fahişə kimi tanınan bir xorvata qucaq açılır (bu haqda sonrakı yazıda). 

Məsələ bununla da kifayətlənmir. Həmin şirkətin media işçiləri hansı saytların akkreditasiyadan keçib-keçmədiyini belə bilmirlər. Hələ mən onu demirəm ki, Bakı Şəhər Halqasının media əməkdaşları son müqaviləyədək şirkətin "Formula 1"lə müqaviləsinin neçənci ilədək olduğundan xəbərsiz idilər və hətta yerli jurnalistləri səhv məlumat verməkdə borclu çıxarırdılar. Xatırlamasanız, bunu sübut kimi təqdim edə bilərəm. Bu, biabırçılıq deyilsə, bəs nədir?

Telekanal işçiləri, "Formula 1"dən yazan jurnalistlər Bakı Şəhər Halqasının mətbuat işindən narazıdır. Niyə? Çünki əsl jurnalistlər yarışı işıqlandırmaq üçün kənarda qoyulub, əvəzində ildə bir dəfə idman jurnalisti olmayan şəxslərdən zorla idman jurnalisti düzəldilib. Vəziyyət o qədər biabırçı həddə gəlib çatıb ki, özünə hörmət edən jurnalistlər o şəxslərə görə boyunlarına bəcik keçirib özlərini onlarla bir sırada tutmaq istəmirlər. Akkreditasiya verilən həmin "idman jurnalistləri"ndən (bəlkə də ümumiyyətlə jurnalist fəaliyyəti yoxdur)  "Formula 1" bolidlərini və pilotlarının adlarını soruşsan, ən yaxşı halda Şumaxer və "Ferrari" adını çəkərlər. Bir də dövlətin pulu hesabına başlarına çəkdikləri içkinin adına görə "Red Bull"u.

Akkreditasiya məsələsini tamamlamlamamış bir məqamı da qeyd edim ki, əgər siz Azərbaycan idmanını düşünən şəxslər olsaydınız, idmanı işıqlandıran saytlara aşağıda göstərilən e-maili göndərməz, abrınıza qısılıb utanardınız. Necə yəni müvafiq tələblərə tam cavab verə bilməmişik? Gözünüzün içinə kimi yalan danışırsınız. Bütün tələblərə riayət olunub. Hansı tələbə əməl olunmayıbsa, sübut kimi təqdim edin! Əslində mən akkreditasiyadan keçirilməyəcəyimi ilk gündən bilirdim, hələ media üçün ziyafətlərin təşkil olunduğu gündən. Sadəcə, prinsipiallıq nümayiş etdirərək sizin həqiqətləri eşitmək, sizin etirafınızı bilmək üçün akkreditasiyaya baş vurmuşdum. Ancaq siz etirafı da bacarmırsız. 

Sifarişin kim tərəfindən verildiyini bilmirəm, bilmək də maraqlı deyil. Mən sizi tanıyıram, digərlərini yox. Siz özünüz keçmişə dayanıqlı əməkdaşlığa görə bunu etiraf etmək cürətində bulunmalıydınız. Növbəti yazı Bakı Şəhər Halqasının yeni BOSS-u haqda olacaq. Hazırlaşsın Part III-ə.

Səbuhi Musa

P.S. Bu yazı "Formula 1" ərəfəsində də mətbuatda işıqlandırıla və Beynəlxalq Avtomobil Federasiyasına şikayət məktubunda da əks oluna bilərdi. Ancaq Azərbaycan idmanının adına xələl gəlməməsi, "Formula 1" kimi mötəbər turnirin ölkəmizdə keçirildiyi bir vaxtda əcnəbilərin qara nöqtə tapa bilməməsi üçün susmağa qərar verdim...