Ölkədə belə bir qurum var: Synergy Partnership.
Bu qurum başından böyük işlər görməyə başlayıb. Deyilənə görə, bu qurumun keçmiş vergilər naziri Fazil Məmmədova məxsus olmuş "Synergy Group"a aidiyyatı yoxdur. Hər halda özləri belə deyir. Amma Azərbaycan adlı balaca məmləkətdə eyni adlı 2 qurumun olması çox təəccüb doğurur.
"Synergy Partnership" – adından da göründüyü kimi qurumun məqsədi tərəfdaşlıq etməkdir. Bu şirkət qurumlara pul müqabilində media ilə əlaqələrin yaradılmasında, onlara press-relizlərin (informasiya mətni) təqdim olunmasında köməklik götürmək öhdəliyini daşıyır.
Synergy.az saytına daxil olduqda göstərilən PR xidmətlər arasında məhz bunlar var:
• PR planın hazırlanması
• Media ilə əlaqələr
• Press relizlər
• Media monitorinq
• Mətbuat konfransları
• Media turlar
• Müsahibələr
2008-ci ildə yaradılan və özünü PR və Marketinq şirkəti adlandıran bu qurum görünür, öz vəzifə missiyalarını unudub və qara işlərlə məşğuldur. Uzun illərdir ki, Baku City Circuit (Bakı Şəhər Halqası) ilə əməkdaşlıq edən şirkət artıq jurnalistlər arasında seçim etməyə başlayıb. Deyəsən, ölkəmiz üçün turistik baxımdan əhəmiyyətli sayılan "Formula 1" tədbirinin işıqlandırılmasında bu şirkət maraqlı deyil. Hər halda görünən son mənzərə budur. Bakı Şəhər Halqasının son tədbirlərində jurnalistlər və fotoqraflar arasında ayrı-seçkilik salınmağa başlanıb. Onların bəziləri tədbirlərə dəvət olunmurlar. Bu insanlar arasında daha əvvəllər "Formula 1" tədbirlərində akkreditasiyadan keçmiş mətbuat nümayəndləri də var. Sizə whatsapp qrupunda olan yazışmaları təqdim etməyimiz kifayətdir ki, hər şeydən hali olasınız...
Hədyanlıq bununla da bitmir. May ayında ölkəmiz ilk dəfə taekvondo üzrə dünya çempionatına ev sahibliyi edəcək. Azərbaycan Taekvondo Federasiyası da mətbuatla əlaqələrin qurulması, jurnalist və fotoqrafların mətbuat konfranslarına dəvət olunması üçün məhz "Synergy"ni seçib. Ancaq bu şirkət "Formula 1"də olduğu kimi, yenə ayrı-seçkiliyə yol verib. Halbuki bu şirkətin xanım əməkdaşları əvvəllər dəfələrlə bəndənizə email göndərib, tədbirə dəvət ediblər (bu barədə şəkillərdə tanış ola bilərsiz). İndi isə mətbuatla idman qurumları arasında əlaqələrin qurulmasına məsul "Synergy" çirkin siyasətə keçib.
Bilmirəm, bu şirkətin rəhbəri kimdir və ya onun bu baş verənlərdən xəbəri varmı? Ancaq bizə bu zərrə qədər də maraqlı deyil. Bizə maraqlı olan odur ki, "Synergy" əməkdaşlıq adı altında ayrı-seçkiliklə məşğul olur və Milli Olimpiya Komitəsinin prezidenti də olan ölkə başçısı İlham Əliyevin idman siyasətinə zidd hərəkət edir. Bu qurumdan rəsmi izahat tələb edirik: Niyə Azərbaycan idmanını 15 ildən çoxdur ki, işıqlandıran Səbuhi Musa və digər şəxslərin imzası onlarda narahatlıq doğurur? Onlara bu əmri verən şəxslər kimlərdir? "Formula 1" kimi mötəbər turnirin, taekvondo üzrə dünya çempionatının bizim tərəfimizdən işıqlandırılmamasını bu qurum və onlara tapşırıq verən şəxslər niyə istəmir?
Səbuhi Musa
P.S. Çox təəssüf edirəm ki, ölkədə 2 idman jurnalistləri qurumu olsa da, onlar bu müddətdə bu barədə səslərini rəsmi şəkildə çıxarmayıblar. Ümid edirəm ki, bu yazıdan sonra Azərbaycan İdman Jurnalistləri Assosiasiyası və Azərbaycan İdman Jurnalistləri İctimai Birliyi də bu ayrı-seçkiliyə göz yummayacaq. Yumulacağı halda, bu qurumların fəaliyyəti haqda şübhələrimiz formalaşacaq.
