Dünən ölkəmizdə ilk dəfə keçiriləcək Yaponiyanın Rayzin Döyüş Federasiyasının "Landmark 7" turnirinin mətbuat konfransı baş tutdu.

Mətbuat konfransında cəmi 3 nəfər sual verib. Bilirsiniz niyə? Əvvəla Azərbaycanda MMA idman növünü bilən idman jurnalisti azdır. Bunların sayı 3 olar, ya olmaz. İdman jurnalisti ki tədbirdə Mehman Məmmədovun və ya Nəriman Abbasovun iştirak edəcəyini bilmirsə, səhvini düzəltmək əvəzinə daha da bataqlığa batırsa, o zaman hər şey aydındır.

Tədbirin təşkilatçılığı kimdə idi? Gənclər və İdman Nazirliyində. Nazirlik isə bu tədbiri keçirməyi Bakı Şəhər Halqasına həvalə etmişdi. Heç bir nəfərdə sual yarandımı ki, "Formula 1" yarışından cavabdeh olan Bakı Şəhər Halqasının loqosu bu tədbirin posterində nə gəzirdi? Bəyəm MMA idmançıları rinqə və ya oktaqona yox, Bakının gözəl trassında bolid sürməyə hazırlaşırdı? Mən də nəyi qoyub, nəyi axtarıram. Üzgüçülük Federasiyasının Mingəçevirdə keçirdiyi "Kürü keçək?" tədbirində Baku City Circuit (BCC) loqosu yer alırsa (halbuki insanlar üzür, maşın sürmür), buna niyə təəccüblənirəm ki? Ümumiyyətlə, BCC mətbuat katibini işlədiyi yerdən çox, gimnastikanın beynəlxalq turnirlərində görəndən bəri heç nəyə təəccüblənməməliyəm...

Bəs yarışa kimlər çağırılmışdı? Basketbol millimizin üzvü Zaur Paşayev, qadın voleybol millimizin üzvü Aynur İmanova, qız cüdo millimizin üzvləri (ilk 2 insan şəkildə görünür – red.). Bu insanların MMA bilikləri nə qədər çoxdur, deyə bilmərəm. Ancaq onu dəqiq deyə bilərəm ki, ora çağırılan jurnalistlərin MMA bilikləri heç də mənimkindən çox deyil. Bəziləri vaxtı ilə MMA-yə qeyri-ciddi idman növü kimi baxdığından ağız büzürdüsə, Tofiq Musayev, Nəriman Abbasovun uğurları tam dəqiqliyi ilə bəndəniz tərəfindən işıqlandırılırdı. İndi kəmərini müdafiə etməyə çalışan Vüqar Kərəmovun ilk geniş müsahibəsi də mənim işlədiyim redaksiyada çıxıb. Hələ onda onun "Rayzin"də çıxışı reallaşmamışdı.

Bəli, mən həmin turnirə dəvət edilməmişdim. Çünki nazirlik və Bakı Şəhər Halqasının öz jurnalist siyahısı var. Ancaq tədbirə dəvət olunmayanlar arasında narazı olanlar da var. Hər zaman Azərbaycanın bütün MMA idmançılarının beynəlxalq yarışlardakı çıxışlarını işıqlandıran MMA.az səhifəsi də bu biganəlikdən narazı qalıb. Sonda həmin səhifənin admininin bu kiçik qeydinə də nəzər salaq:

"Biz heç vaxt öz arvadlarını qabağa verən millət olmamışıq. Bizim qonşulardan fərqli olaraq. Amma zaman gəlib, onlara oxşamışıq.

Xəbərimiz var ki, ölkəmizdə MMA-yı inkişaf etdirən və daima bu industriyanın içində olan insanlar bu tədbirə heç çağırılmayıb, bəzi peşəkar döyüşcülərimiz isə ayaq üstə qalıb. Amma gördüyünüz MMA-in “M” hərfindən başı çıxmayan gözəlçələrə ilk sıralarda yer tapılıb.

Belə başa düşürük ki, mətbuatda yayılan foto və videolarda, konfransda qara-qura qaqaşların yerinə bunları toplayıblar ki, sivil görünsün.

Nə vaxtsa, bu ölkədə sadə insanlara yer veriləcək. Yəqin ki".

Səbuhi Musa