FIBA Avropa Kubokunun müntəzəm mövsümünün H qrupunda “Neftçi” doğma meydanda Rumıniyanın “Oradea” klubuna 83:99 hesabı ilə məğlub olub.
Prosport.Az xəbər verir ki, qarşılaşmadan sonra “Neftçi”nin baş məşqçisi Konstantinos Vasileiadis mətbuat konfransında jurnalistlərin suallarını cavablandırıb.
Yunanıstanlı mütəxəssis məğlubiyyətin səbəblərindən, komandanın zədə problemlərindən, mümkün transferlərdən və avrokuboklardakı çıxışından danışıb.
– Əslində, yeni heç nə yoxdur. Yenə oyuna zəif başladıq. Daha sonra geri dönməyi bacardıq və düşünürəm ki, yaxşı mübarizə apardıq. Oyunun müəyyən hissələrində, iki-üç, hətta dörd dəqiqə ərzində üstünlük qura bildiyimizi gördük. Lakin hesab yaxınlaşanda yenə səhvlərə yol verdik. Hücum ribaundları verdik, top itkiləri etdik. “Oradea” çox təcrübəli və yaxşı komandadır. Rəqib bu səhvlərdən dərhal istifadə edərək sürətli hücumlarla asan xallar qazandı. Oyun sonadək bu ssenari üzrə davam etdi.
– Bu turnirdə qələbə qazanmağın nə qədər çətin olduğunu bilirik. Dünən “Sabah” Basketbol Çempionlar Liqasında ilk qələbəsini qazandı. Sizcə, “Neftçi” də qarşıdakı oyunlarda qələbə qazana bilərmi?
– Digər komandalar haqqında danışmaq istəmirəm. “Sabah”ın qələbəsi ölkə basketbolu üçün çox yaxşıdır. Biz isə həmişə öz komandamıza, hər məşqdə və hər oyunda necə inkişaf edə biləcəyimizə diqqət yetiririk. İstər daxili çempionatda, istərsə də FIBA turnirində əsas məqsədimiz budur.
Əsas problemimiz ən yaxşı oyunçumuzun sıradan çıxmasıdır. Bu gün isə Elayza Hokins oyunun cəmi birinci dəqiqəsində ayağında problem hiss etdi. Onu əvəzləmək üçün başqa pleymeykerim yox idi. Buna görə də üç, dörd, hətta beş kiçik oyunçu ilə oynamağa məcbur qaldım. Eyni zamanda, iki uzun oyunçudan istifadə edirdim. Başqa pleymeykeriniz olmayanda həll yolu tapmaq çətinləşir.
Oyunun sonunda bütün meydança boyu təzyiq göstərə, bəlkə də top ələ keçirə biləcək oyunçuları meydana buraxdım. Düşünürəm ki, müdafiədə yaxşı iş gördük. Amma vəziyyət belədir və yolumuza davam edəcəyik.
Zədə problemləri uzanarsa, bəzi oyunçuları dəyişdirməyi düşünüb-düşünməyəcəyimizə qərar verməli olacağıq. Artıq bir aydan çoxdur ki, vacib oyunçularımız olmadan çoxsaylı matçlar keçiririk. Daha bir ay yarım belə davam etməsini gözləyə bilmərik. Sabahdan etibarən vəziyyəti qiymətləndirib qərar verəcəyik.
– Avrokuboklarda ardıcıl dörd məğlubiyyətdən sonra komandanın çıxışını necə qiymətləndirirsiniz? Oyunda irəliləyiş görürsünüzmü?
– Bəli, irəliləyiş görürəm. FIBA Avropa Kubokunun çətin turnir olacağını bilirdik. Burada güclü komandalar mübarizə aparır. Düşünürəm ki, dörd oyunun demək olar ki, hamısında sonadək rəqabət apardıq. Lakin matçların son iki-üç dəqiqəsində fərqin 15-20 xala qədər artmasına imkan verdik.
Son oyunumuzda “Friburq”a qarşı çox yaxşı çıxış etdik. Qələbə qazanmaq üçün sonadək mübarizə apardıq. Oyunçulara da demişəm ki, FIBA turnirindəki oyunlar ölkə çempionatındakı matçlarla eyni deyil. Burada daha diqqətli və daha yaxşı hazırlaşmış olmalısınız.
Biz məşqçilər olaraq öz işimizi görürük. İndi oyunçular da FIBA turnirində daha yaxşı çıxış etməlidirlər.