“Bu, kubok oyunu idi. Etiraf edək ki, hazırda Azərbaycanda kubok matçlarına gələn tamaşaçıların sayı, demək olar ki, az olur. Buna baxmayaraq, bu gün Gəncə Stadionunda azarkeşlərimiz bir daha göstərdilər ki, hər zaman komandanın yanındadırlar. Bizi dəstəklədiklərinə görə onlara təşəkkür etmək istəyirəm”.

Prosport.Az xəbər verir ki, bunu “Kəpəz”in baş məşqçisi Azər Məmmədov evdə “Baku Sportinq”ə 3:1 hesabı ilə qalib gəldikləri Azərbaycan Kubokunun II təsnifat mərhələsinin oyunundan sonra deyib.

50 yaşlı mütəxəssis daha az oyun təcrübəsi qazanan futbolçulara şans verməyə çalışdıqlarını bildirib: “Zədədən qayıdan bəzi futbolçularımız da var idi. Düşündük ki, bu matç onlar üçün müəyyən qədər bərpa olunmaq baxımından fürsət ola bilər. Sevindirici məqam ondan ibarətdir ki, bu gün Gəncə futbolunun 5 yetirməsi əsas heyətdə meydana çıxdı. Daha bir futbolçumuz isə sonradan oyuna daxil oldu. Əslində, daha çox yerli yetirmələrimizə, ehtiyatdan meydana daxil olmaqla belə, şans verməyi düşünürdük. Təəssüf ki, oyunun nəticəsi bizi gözləmə mövqeyinə gətirdi və başqa variantlara əl atmağa məcbur olduq”.

O, “Bakı Sportinq”in yeni baş məşqçisi Bəxtiyar Soltanov barədə xoş sözlər söyləyib: “Bilirdik ki, komandada baş məşqçi dəyişikliyi baş verib. Fürsətdən istifadə edərək Bəxtiyar müəllimi təbrik edir, ona işində uğurlar arzulayıram”.

Məmmədov etiraf edib ki, kubok oyunları həmişə ağır keçir: “Rəqibin Birinci Liqada və ya Premyer Liqada çıxış etməsinin fərqi yoxdur. Bu gün bizim üçün də, xüsusilə ilk hissədə, çətin oldu. İkinci hissədə isə komandamızın tam istədiyimiz kimi futbol oynadığını düşünürəm. Allahın köməkliyi ilə qələbə qazandıq. Komandamızı və futbolçularımızı təbrik edirəm. Qarşıda bizi “İmişli” ilə vacib oyun gözləyir. Artıq bu gündən həmin matça hazırlaşmağa başlayırıq”.

Qeyd edək ki, “Kəpəz” 1/8 finalda “Turan Tovuz”un qonağı olacaq.