Kişi voleybolu üzrə son Azərbaycan çempionu "Xilasedici"nin CEV XTB Çempionlar Liqası üçün iştirak ərizəsi bəlli olub.

Prosport.Az-ın xəbərinə görə, komanda Portuqaliyanın "Sportinq" komandası ilə oyunlar üçün Azərbaycan Superliqasındakı heyəti sifariş edib.

14 voleybolçu sifariş olunub. Komandanın heyətində 8 legioner var. Bunlar Kubadan Luis Estrada (hücumçu), Qustavo Almora (blokçu), Luis Reyes (hücumçu), Danimarkadan Tobias Kyer (hücumçu), Fransadan Pyer Bulö (libero), Venesueladan Xose Karasko (toppaylayıcı), Çexiyadan Daniel Çex (hücumçu) və Serbiyadan Aleksa Polomatsdır (blokçu). Bu legionerlərdən Luis Estrada, Tobias Kyer, Daniel Çex, Aleksa Polomats və Pyer Bulö yeni transferlərdir.

Yerli oyunçular isə bunlardır: Vüqar Bayramov (hücumçu), Əmirmehdi Əblu (toppaylayıcı), Elmin Alışanov (blokçu), Emil Abdullayev (libero), Asif Əliyev (hücumçu), Ramazan Ağabayov (blokçu).

Baş məşqçi Cəlil Cəlilovun köməkçiləri Famil Ağayev, fransalı Siril Onq və braziliyalı fiziki hazırlıq üzrə məşqçi Sezaudur.    

Qeyd edək ki, ilk oyun 3 noyabrda Hövsan qəsəbəsində yerləşən FHN İdman Sağlamlıq Mərkəzində ("FHN Arena") baş tutacaq. Bakıdakı matçda Ozan Çağı Sarıkaya (Türkiyə) 1-ci, Tomislav Popoviç (Serbiya) 2-ci referi olacaq. Matç saat 18:00-da başlayacaq və tamaşaçılar biletsiz oyunu izləyə biləcək.

Cavab qarşılaşması isə 11 noyabrda Portuqaliyanın paytaxtı Lissabonda olan Juau Roşa adına Pavilyonda keçiriləcək. Karlos Robles (İspaniya) 1-ci, alman əsilli Dyula Tilmann (Macarıstan) 2-ci referi qismində ədaləti qoruyacaq. Oyun Bakı vaxtı ilə saat 23:30-da başlayacaq.