“Oyuna nəzarət edən tərəf biz idik. Başlayandan sona qədər üstün idik. Topla durmadan hücumlar edirdik. Bilmirəm, rəqib qapısına neçə zərbə vurduq. Amma sonda bunun ustalıqdan, yoxsa başqa nədənsə qaynaqlandığını bilmirəm. Hər halda, nəticə sonda yadda qalır. Nə qədər desəm də, illər keçəcək və bu oyun bir növ ayıbımız kimi yadda qalacaq. Ona görə də ilk növbədə xalqımızdan, hər kəsdən öz adımdan üzr istəyirəm”.

Prosport.Az xəbər verir ki, bunu Azərbaycan millisinin hücumçusu Mahir Emreli UEFA Millətlər Liqasında Lixtenşteynlə 0:0 hesablı heç-heçə etdikləri oyundan sonra deyib.

O, qarşılaşmanın nəticəsinin komanda üçün ağır olduğunu bildirib: “İnsanı bir qədər ağrıdır. Çünki başa düşürsən ki, heç-heçə də belə qaneedici nəticə kimi görünmürdü. Hələ də qaçırdığımız epizodlar gözümün önündən gəlib keçir. Bu oyundan sonra komandada vəziyyət yaxşı deyil. Qısa zamanda toparlanıb yeni oyuna hazırlaşmalıyıq”.

Mahir Emreli fasilədə baş məşqçi Ayxan Abbasovun komandaya verdiyi tapşırıqlardan da danışıb: “Biz ilk hissədə daha çox yerlə ötürmələrlə oynayıb cərimə meydançasına daxil olmağa çalışırdıq. Fasilədə baş məşqçinin tələbi oldu ki, daha çox topu cərimə meydançasına qaldıraq və daha çox zərbə vuraq. Çünki istəyirdik ki, divar ötürmələrlə rəqibin müdafiəsini yarıb keçək. Bilirdik ki, rəqib müdafiədə oturacaq. Cərimə meydançası yaxınlığında çalışıb zərbələr vurmalıydıq. Çünki zərbə vurmasanız, qol olmayacaq”.

Hücumçu azarkeşlərə də müraciət edərək komandada nəticəni düzəltmək üçün məsuliyyətin dərk edildiyini vurğulayıb: “Hər birindən, kiçiyindən böyüyünə qədər hər kəsdən bu nəticəyə görə üzr istəyirik. Bunu biz etdik. Əvvəldən bütün milli komanda – istər futbolçular olsun, istər işçilər – hər kəs bu vəziyyət haqqında düşünür. Bunu düzəltmək öz əlimizdədir. 3 gün sonra həmin oyunda qalib gəlməliyik ki, həm özümüzə, həm də xalqımıza heç olmasa inamı yenidən qaytaraq və bu qrupdan çıxmaq şansımız qalsın”.