"Qəbələ"nin prezidenti Fariz Nəcəfov "Zirə" ilə oyundan sonra jurnalistlərə müsahibə verib.
Prosport.Az xəbər verir ki, Nəcəfov komandasının V turdakı qələbəsini şərh edib: "Komandamızdan qələbə gözləyirdik. Biz bilirdik ki, hansısa oyunda dirçələcəyik, öz oyunumuzu göstərməyə başlayacağıq. Bu gün əvvəlkilərdən daha yaxşı oynadıq. Amma yenə də mənim istədiyim oyun bu deyil. Həmin komanda deyilik".
– Hər halda, bu qələbə psixoloji baryeri keçməyinizə kömək olacaq?
– Belə də demək olar. Çünki 4 oyunda qalib gəlməmişdi, V turda qələbə qazandıq. Ancaq belə olacağını bilirdik. Komandamızın hansısa oyunda düzələcəyinə əmin idik. Şəxsən mən komandama tam inanırdım. Bu gün yanılmadığımı gördüm.
– Matçdakı gərginliyi nə ilə əlaqələndirirsiniz?
– İnanın ki, hansısa səbəbi yoxdur. Avrokuboklarda "Omoniya" ilə oynadıq, daha sonra "Sabah"la görüşə çıxdıq. Heç bizi nəzərə də almadılar. İlk dəfə PFL haqda burada deyirəm. Elə şikayət kimi də olsun, eşitsinlər, biz həmin günü gecə yolda olmuşduq. İstirahətə vaxtımız da olmadı. Yorğun idik.
– PFL-ə müraciət etmişdiniz?
– Xeyr. İstəmədik ki, edək. Çünki onlar özü bunu fikirləşməlidir. Qayda ilə 3 gündən sonra oyuna çıxmaq olar. Onlar qaydanı pozmayıb. Lakin nəzərə almalıydılar ki, 1 günü yolda olmuşduq. "Sabah"la matçda uğursuzluğu yorğunçuluğa bağlaya bilərəm. Amma sonrakı matçlarda komanda bundan əvvəlki məğlubiyyətlərin atmosferindən çıxa bilmirdi. Fərdi səhvlər edirdik. Analiz edib çox şey danışmaq olar. Bu vəziyyətdən çıxmaq lazımdır. Sevindirici hal odur ki, öz oyunumuzu göstərib qalib gəldik.
– Söz-söhbət gəzirdi ki, komanda uduzsaydı, Elmar Baxşıyev üçün "Qəbələ"də sonuncu oyun olacaqdı...
– Xeyr, qətiyyən belə deyil. Komanda Premyer Liqada qalmaq şərtilə, nə qədər uduzsa da, Elmar Baxşıyev baş məşqçi postunda qalacaq. Ona və futbolçularıma tam inanıram, güvənirəm. Baş məşqçinin qarşısına avrokuboklara vəsiqə qazanmaq tapşırığı qoyulmayıb. Əvvəldən danışığımız belə bu olmayıb. Ardıcıl 2 il bunu etdik. Ola bilər ki, bu mövsüm bacarmayaq. Alınsa, lap yaxşı.
– Transfer edəcəksiniz?
– 1 futbolçu gələ bilər. Danışıqlar davam edir. Legioner olacaq. Hücum xətti üçün düşünürük.
– Yenə 1 illik müqavilə olacaq?
– Bundan əvvəlki illərdə komanda tam dağılırdı. Futbolçularla 2 illik müqavilə edə bilməzdim, çünki dayanıqlılığımız yoxdur. Komanda dağılsaydı, gərək mən evimi, maşınımı satıb, maaşları verərdim. Bu tendensiya davam etdi. Çünki indi də büdcə özümüzdən, sponsordan yox, dövlətdən asılıdır. O da uzunmüddətli deyil ki, hər il üçün verək.
– Akademiyanız üçün sponsor tapmışdınız. Bu il sponsor sayı artacaq?
– Danışırıq. Həmin sponsorluq da dostluq əlaqələrindən yaranmışdı. Yenə davam edir. Yəqin ki, akademiyamızın güclü olmasını Azərbaycanda, Qəbələdə hamıdan çox mən istəyirəm, məndən çox istəyən ola bilməz. Əlimizdən gələni edirik.
– AFFA ayrılan vəsaitdən tutulmalar etdi. Hansı kriteriyaları yerinə yetirmirdiniz ki, belə oldu?
– Bəli, tutulmalar oldu. Hamısını deməyim. Ən dəqiq olanı qadın futboluna və bölgələrdə uşaq futbol məktəbinin yaranması məsələsi ilə bağlı idi. 2-si tam kəsildi. Bu da büdcənin 8-10 faizidir. Amma başqa kəsilmələr də oldu. Halbuki, onlarla da razı deyiləm.
– Həmin öhdəliklər bu il dəyişilib?
– Bəli.
– Qismət Alıyev hər dəfə “Qəbələ” azarkeşləri ilə münaqişə yaşayır. Bu nə ilə əlaqədardır? Buradan gedəndə problemlə ayrılıb?
– Qəti. Buradan tam yaxşı şəkildə ayrılmışıq. Akademiyanın nümunəvi futbolçularından olub. İndi də xətrini çox istəyirəm. Oyununa da azarkeşlik edirəm. Bəzən azarkeşlər ondan feyr-pley qaydalarına riayət etməsini, buradakı matçlarda hakimlərlə və bizim oyunçularla mübahisələrə girməməsini istəyirlər. Oyunda olan şeylərdir.