Kişi voleybolu üzrə son Azərbaycan çempionu "Xilasedici"nin CEV XTB Çempionlar Liqasındakı oyununun hakimləri müəyyənləşib.

Prosport.Az-ın xəbərinə görə, I mərhələdən azad olan Fövqəladə Hallar Nazirliyinə (FHN) məxsus olan klub II mərhələdə məşhur Portuqaliya təmsilçisi "Sportinq"lə qarşılaşacaq.

İlk oyun 3 noyabrda Hövsan qəsəbəsində yerləşən FHN İdman Sağlamlıq Mərkəzində ("FHN Arena") baş tutacaq. Bakıdakı matçda Ozan Çağı Sarıkaya (Türkiyə) 1-ci, Tomislav Popoviç (Serbiya) 2-ci referi olacaq. Matç saat 18:00-da başlayacaq.

Cavab qarşılaşması isə 11 noyabrda Portuqaliyanın paytaxtı Lissabonda olan Juau Roşa adına Pavilyonda keçiriləcək. Karlos Robles (İspaniya) 1-ci, alman əsilli Dyula Tilmann (Macarıstan) 2-ci referi qismində ədaləti qoruyacaq. Oyun Bakı vaxtı ilə saat 23:30-da başlayacaq.

Qeyd edək ki, komandamız mərhələ adlaya bilsə, III mərhələdə "ACH Volley" (Sloveniya) – "Orion Stars" (Niderland)/"Ştip UQD" (Şimali Makedoniya) cütünün qalibi ilə qarşılaşacaq.