Azərbaycanın qadın voleybolu üzrə Yüksək Liqasında debüt edəcək "Naxçıvan" klubunun yeni rəhbərinin adı bəlli olub.

Prosport.Az-ın xəbərinə görə, 2024-cü ildən fəaliyyət göstərən kluba türkiyəli iş adamı Emin Uçar sahib çıxıb.

O, Türkiyə, Azərbaycan və Gürcüstanda inşaat sektorunda fəaliyyət göstərən iş adamı kimi tanınır. 2015-ci ildən Qazaxda fəaliyyət göstərən "Arkoz" sement zavodu ona məxsusdur.

Həmçinin, Emin Uçarın rəhbəri olduğu "Maqro Qrup" şirkəti Gürcüstanda inşaat və inkişaf, hotel və yaşayış, mebel istehsalı, pərakəndə satış və qida sektorlarında fəaliyyət göstərir.

Qeyd edək ki, "Naxçıvan"ın əvvəlki adı "Möminə Xatun" olub. Lakin klub 3 gün əvvəl bəyanat yayaraq Yüksək Liqada "Naxçıvan" adı ilə çıxış edəcəyini açıqlayıb. Buna səbəb kimi isə əvvəlki adın Naxçıvanda oğlan voleybolu üçün də fəaliyyət göstərməyə mane olduğu göstərilib.