Bu gün Bakıda qadın voleybolu üzrə Avropa çempionatının C qrupunun oyunlarına start veriləcək.

Prosport.Az yarış barədə maraqlı məlumatları təqdim edir:

34-cü dəfə keçiriləcək yarış 4 ölkədə keçiriləcək. Azərbaycandan başqa, Çexiya, İsveç və Türkiyə də meydan sahibləri sayılır. Paytaxtımız Bakı C, İsveçin Yötebori (Göteborg) şəhəri isə D qrupunun oyunlarına ev sahibliyi edəcək. Çexiyanın Brno şəhərində B qrupunun bütün oyunları, eləcə də 1/8 finalın 4, 1/4 finalın 2 matçı keçiriləcək. İstanbulda isə A qrupunun bütün oyunları, o cümlədən 1/8 finalın 4, 1/4 finalın 2, yarımfinal və final/3-cü yer uğrunda qarşılaşmalar təşkil olunacaq.

Azərbaycan artıq 2-ci dəfədir ki, Avropa çempionatına şərikli ev sahibliyi edir. 2017-ci ildə Azərbaycan qonşu Gürcüstanla birgə belə təcrübəyə malikdir. Onda Faiq Qarayevin yetirmələri 3-cü yer uğrunda görüşdə Türkiyəyə 1:3 uduzaraq 4-cü olmuşdu. Finalda isə Niderlanda 3:1 qalib gələn Serbiya 2-ci dəfə Avropa çempionu olmağı bacarmışdı.

Ev sahibliyi Azərbaycana necə verildi? 

Bu yarışın Azərbaycana verilməsi qərarı isə 12 mart 2024-cü ildə elan edilib. Bunadək Çexiya (6 dekabr 2023-cü il) və İsveçin (6 mart 2024-cü il) ev sahibliyi bilinirdi. Sonuncu əsas meydan sahibi olan Türkiyənin bu yarışa 1967, 2003 və 2019-cu ildən sonra 4-cü dəfə ev sahibliyi etməsi isə 2024-cü ilin 8 noyabrında rəsmiləşib. Yeri gəlmişkən, Çexiya da 1993 və 1997-ci ildə bu yarışa ev sahibliyi edib. Yeganə İsveçdir ki, ilk dəfə bu yarışın təşkilatçısıdır.

Onu da bildirək ki, Azərbaycandan əvvəl bu yarışa ev sahibliyi edəcək ölkə Avstriya olub. Lakin Avstriya Voleybol Federasiyası yerli hökumətin daha çox çimərlik voleyboluna pul ayırması səbəbindən, 2 həftəlik gözləmə xahiş edib. Azərbaycan Voleybol Federasiyasının ev sahibliyi təşəbbüsündə olmasına görə, Avropa Voleybol Federasiyası qərarını ölkəmizin xeyrinə verib.  

Bunadək Avropa çempionatları tək illərdə keçirilsə də, 22 iyun 2023-cü ildə Beynəlxalq Voleybol Federasiyası 2026-cı ildən başlayaraq bütün qitə yarışlarının cüt illərdə keçiriləcəyini elan edib. Bu səbəbdən bu Avropa çempionatı 1958-ci ildə Çexoslovakiyada keçirilmiş yarışdan sonra cüt illərdə keçirilən ilk Avropa çempionatı kimi tarixə düşəcək.

Yarışa giriş biletlə olacaq. Biletlər ötən ilin noyabrın 7-dən satışdadır. Azərbaycanda bilet qiyməti 5, 10, 15 və 20 AZN-dir.

Avropa çempionatının iştirakçıları hansı komandalardır?

24 komanda yarışda iştirak edəcək. Ötən ilin oktyabrın 4-də İtaliyanın Bari şəhərində keçirilmiş püşkatmaya görə, 6 komanda 4 qrupa bölünüb.

4 meydan sahibindən başqa, Serbiya, Niderland, İtaliya, Polşa, Fransa, Bolqarıstan, Ukrayna, Slovakiya (2023-cü ildə keçirilmiş Avropa çempionatında tutduqları yerə uyğun vəsiqə qazanıblar), Almaniya, Belçika, Sloveniya, Monteneqro, İspaniya, Yunanıstan, Xorvatiya (seçmə mərhələdə qrup qalibləri olduqları üçün vəsiqə qazanıblar), Rumıniya, Macarıstan, Portuqaliya, Latviya və Avstriya (seçmə mərhələdə qrup 2-ciləri olduqları üçün vəsiqə qazanıblar) bu yarışa vəsiqə qazanıb. Bunlardan Monteneqro debüt edəcək.

Azərbaycan Avropa çempionatında 11-ci dəfə iştirak edəcək. 2005-ci ildən bəri Avropa çempionatına qatılırıq. Bu yarışda ən yaxşı nəticəmiz 2005-ci ildə Xorvatiyada debüt etdiyimiz və 2017-ci ildə Bakıda keçirilmiş Avropa çempionatında olan 4-cü yerlərdir.

Turnirdəki komandalardan İtaliya (2007, 2009, 2021) və Serbiya (2011, 2017, 2019) 3, Polşa (2003, 2005) 2, Türkiyə (2023), Niderland (1995), Bolqarıstan (1981) və Çexiya (1955-ci ildə Çexoslovakiya adı ilə) Avropa çempionu ola bilib. "Filənin sultanları" ləqəbi olan Türkiyə son Avropa çempionları kimi yarışa qatılır.

Bakıda hansı komandalar olacaq?

Yarış Milli Gimnastika Arenasında keçiriləcək. Burada C qrupunun 15 matçı təşkil olunacaq. Qrupda Azərbaycan, Portuqaliya, Niderland, Belçika, Rumıniya və İspaniya mübarizə aparacaq. Qrupda ilk "4-lük"də olmaq 1/8 finala vəsiqə qazandıracaq. Qrupda 5-6-cı yerləri tutmuş komandalar turnirlə erkən vidalaşacaq. 

21-28 avqust tarixində qrup matçları keçiriləcək. Bu gün Milli Gimnastika Arenasında 1, qalan günlər 2 matç baş tutacaq. Rəsmi açılış mərasimi də bu gün saat 18:15-dən etibarən baş tutacaq.

21 avqust
19:00 Azərbaycan – Portuqaliya

22 avqust
15:30 Belçika – İspaniya
18:30 Rumıniya – Niderland

23 avqust
15:30 Portuqaliya – Belçika
18:30 İspaniya – Azərbaycan

24 avqust
15:30 Niderland – Portuqaliya
18:30 Azərbaycan – Rumıniya

25 avqust
15:30 Rumıniya – Belçika
18:30 Niderland – İspaniya

26 avqust
15:30 İspaniya – Portuqaliya
18:30 Belçika – Azərbaycan

27 avqust
15:30 Niderland – Belçika
18:30 Portuqaliya – Rumıniya

28 avqust
15:30 İspaniya – Rumıniya
18:30 Azərbaycan – Niderland

Ümumilikdə isə Avropa çempionatı 5 sentyabrda İstanbulda keçiriləcək finalla başa çatacaq.

Səbuhi Musa