Qadın voleybolçulardan ibarət Azərbaycan millisinin də iştirak etdiyi Avropa çempionatında qrup mərhələsi dünən axşam başa çatdı. Təəssüflər olsun ki, türkiyəli mütəxəssis Ataman Güneyligilin rəhbərlik etdiyi yığmamız qrup mərhələsindən çıxa bilmədi. Almaniyanın Düsseldorf şəhərinin ev sahibliyi etdiyi C qrupunda millimiz 5 xal toplayaraq, 5-ci yeri tutdu.

Xatirimdədi ki, bir neçə ay öncə Milli Voleybol Mərkəzində Ataman Güneyligilin ictimaiyyətə təm-təraqlı təqdimatı keçirilmişdi. Mərasimdə Azərbaycan Voleybol Federasiyasının ən üst səviyyədə səlahiyyətli şəxsləri, idman ictimaiyyətinin üzvləri və jurnalistlər də iştirak edirdilər. Həmin vaxt idman jurnalistlərinin suallarını cavablandıran türkiyəli mütəxəssis Azərbaycan yığmasını kənardan izlədiyini və millinin yüksək perspektivə malik olduğunu bildirmişdi. Hətta baş məşqçi, Avropa çempionatı ilə bağlı qulağa xoş gələn bir sıra vədlər də səsləndirmişdi. Ancaq artıq bütün deyilənlərin elə qrup mərhələsindən o yana getmədiyinin şahidi oluruq. 

Həmin təqdimat mərasimində mənim "İstanbulla Bakı arasında qısa müddətdə komandanı çalışdıra biləcəksiniz? Yəni 3 aylıq zaman kəsimində nəticə əldə edə biləcəksinizmi?" suallarıma cavabında Ataman Güneyligil heç bir problem yaranmayacağını və ən yaxşı nəticələrin əldə ediləcəyinə dair vədlər vermişdi. Lakin görünən odur ki, biz vədlərə öyrəşmişik. Onun verdiyi vədlər bir vaxtlar Azərbaycanın futbol üzrə milli komandasının baş məşqçisi Berti Foqtsu xatırlatdı mənə. Siyahını uzatmaq da olar. Bir çox idman sahələrində olduğu kimi...

Lap elə götürək taekvondo üzrə dünya çempionatındakı uğursuzluğu. Bir balaca dərindən nəzər yetirdikdə millilərimizin üzləşdiyi uğursuzıuqlarda əsas səbənin və günahkarın əcnəbi məşqçilərlə bağlı yarandığının şahidi oluruq.

Elçin Abbasov