"Sumqayıt"ın Pakistan əsilli ingiltərəli legioneri İsa Suliman Premyer Liqanın III turunda ilk qolunu "Qəbələ"yə vurdu. 

Prosport.Az xəbər verir ki, 25 yaşlı mərkəz müdafiəçisi oyundan sonra jurnalistlərə müsahibə verib.

– İlk olaraq oyun barədə fikirlərinizi öyrənək...
– Çətin oyun oldu. Heç də yaxşı formamızda deyildik. Amma biz xarakter göstərərək istədiyimiz nəticəni əldə etdik.

– Formada olmadığınızı dediniz. İstədiyiniz formada olmağınız üçün təxminən neçə tur keçməsi lazımdır?
– Bunu zaman göstərəcək. Bunun üçün daha çox oyun keçirməyimiz lazımdır.

– Ölkəmizdə ilk qolunuzu vurdunuz...
– Vurduğum 1-ci qolla komandamın qələbə qazandığı üçün fəxr edirəm.

– Davamı gələ bilərmi? Ümumiyyətlə, standard vəziyyətlərdən fərqlənməyi xoşlayırsınız?
– Açığı, mənim üçün əsas olan qol vurmaq yox, müdafiədə komandama kömək etməkdir. Səmimi etiraf edim ki, peşəkar karyeramda ilk qolumdur. Adət etdiyim bir şey deyil (gülür).

– Sona yaxın 1 epizodda topu boş qapıdan çıxardınız. Vurduğunuz qolu, yoxsa komandanızı qoldan xilas etməyi daha dəyərli hesab edirsiniz?
– Mənim üçün qol vurmaq daha fərəhlidir. Lakin əsas məqsədim müdafiədən oynamaqdır. Ən əsas olanı isə nəticə idi və onu da qazandıq.

– Bu gün matçın adamı olmağınız ölkəmizə daha yaxşı adaptasiya olmağınıza nə kimi fayda verə bilər?
– Təbii ki, daha çox köməyi dəyəcək. Daha çox oyun, daha çox zaman lazımdır. Cəmi 1 aydır burdayam və 2 oyun keçirmişəm. Lakin oyunun qəhrəmanı olmasam belə, üzərimdə daha çox işləyirəm ki, proses tez keçsin.

– Premyer Liqanın səviyyəsi bura gələnə qədər düşündüyünüz kimidir, yoxsa gözlədiyinizdən daha yaxşı səviyyə ilə üz-üzəsiniz?
– Gələnə qədər o qədər də məlumatlı deyildim. Əslində indi də çox məlumatlı sayılmaya bilərəm. Cəmi 2 oyun keçirmişəm. Amma yaxşı olduğunu deyə bilərəm. Müxtəlif ölkələrdən legionerlər var. Elə hücumçular var ki, mənə çətinlik yarada biləcək. Onlara qarşı oynamaqla təcrübə yığacağam.

– Azərbaycanla bağlı ilkin təəssüratlarınız necədir?
– Mən Sumqayıtda yaşayıram. Paytaxt Bakı da yaxın olduğu üçün gedib-gəlirəm. Fikirlərim çox müsbətdir.

– Azərbaycanda pakistanlılara xüsusi münasibət var. Bunu hiss edirsiniz?
– Bura gəlməmişdən əvvəl ölkələrimiz arasında yaxşı münasibətlərin olduğunu demişdilər. Müsəlman ölkəsidir və mən də bunu hiss edirəm. Azərbaycanlılar haqqında fikrim çox yaxşıdır.