UFC Fight Night Baku turnirində Erik Nolanı məğlub edən Azərbaycan təmsilçisi Fərman Həsənov döyüşdən sonra təəssüratlarını bölüşüb.

Prosport.Az xəbər verir ki, o, UFC-də debütünü doğma azarkeşlər önündə qələbə ilə başa vurmağın xüsusi hiss olduğunu bildirib.

"Əla hiss edirəm. İlk döyüşüm UFC-də, üstəlik Vətəndə idi. Bu bir motivasiya idi. Qələbə ilə bitirmək qürurverici bir hissdir. Bütün Azərbaycan xalqına təşəkkür edirəm. Başımı qaldıranda millətimi görəndə duyğularımın pis olma ehtimalı yoxdur. Qələbəni xalqıma, millətimə həsr edirəm".

Rəqibi Erik Nolanın "Axşam vaxtı" ləqəbi ilə bağlı verilən sualı isə yumorla cavablandırıb:

"Ola bilər onda axşam vaxtı ləqəbdir. Amma indi Bakı vaxtı ilə axşamdır".

Fərman Həsənov UFC ilə 4 döyüşlük müqaviləsinin olduğunu da açıqlayıb.

"UFC ilə 4 döyüşlük müqavilə var. ABŞ-ə köçmək fikrim yoxdur. Zatən orada məşq və toplanış keçirik. Təzəlikcə, 3 həftə əvvəl İbrahim müəllim ilə orda idik. ABŞ-yə köçməyə gəlincə, bizim yeməklər orda yoxdur. Ora getsək də, geri qayıtmağa çalışırıq".