Azərbaycan boksçusu Səidcəmşid Cəfərov Çinin Quyyan şəhərində keçirilən Dünya Kubokunda qızıl medal qazanıb.

Prosport.Az xəbər verir ki, 75 kq çəki dərəcəsində çıxış edən milli üzvü finalda bolqarıstanlı Rami Kiuan ilə üz-üzə gəlib.

Cəfərov üstün performans nümayiş etdirərək hər 3 raundu öz xeyrinə başa vurub və rəqibini 5:0 hesabı ilə məğlub edib (30:27, 30:27, 30:27, 30:27, 29:28).

Qeyd edək ki, 40 ölkədən 300-dən çox idmançının iştirak etdiyi reytinq xarakterli yarışda Azərbaycan millisi ümumilikdə 1 qızıl və 2 bürünc medalla çıxışını başa vurub. Komandanın digər üzvləri Murad Allahverdiyev (80 kq) və Alfonso Dominqes (90 kq) bürünc mükafata layiq görülüb.