Qadın voleybolçular arasında Azərbaycan Yüksək Liqasında yarımfinal mərhələsinin cavab matçlarına start verilib.

Prosport.Az xəbər verir ki, ilk oyun günündə "DH Volley" "Milli Aviasiya Akademiyası" ilə üz-üzə gəlib.

Oyun Gənclər və İdman Nazirliyinin Voleybol Mərkəzində baş tutub. Qarşılaşma "Milli Aviasiya Akademiyası"nın qələbəsi ilə bitib – 3:2.

Tərəflər arasında ilk qarşılaşmada çempionatın debütantı "DH Volley" 3:0 hesabı ilə qələbə qazandığı üçün "qızıl set" oynanılıb. Burada üstün olan (15:12) "DH Volley" adını finala yazdırıb.

Yarımfinal mərhələsinin digər görüşü sabah Tovuz Olimpiya İdman Kompleksində "Turan" və "Gəncə" kollektivləri arasında keçiriləcək.

Qeyd edək ki, reqlamentə əsasən, yarımfinal mərhələsi ev və səfər prinsipi ilə 2 oyundan ibarətdir. Nəticəyə əsasən komandaların qələbə sayı bərabər olarsa, qalibi müəyyənləşdirmək üçün "qızıl set" oynanılır.

Bürünc və qızıl medal uğrunda həlledici qarşılaşmalar isə cəmi 1 oyundan ibarət olacaq.