“Təəssüf ki, azərbaycanlı məşqçilər tənbəldir".
Bu sözləri idman.biz-ə açıqlamasında Azərbaycanın gənclər və yeniyetmələrdən ibarət qız voleybol komandalarımızın baş məşqçisi Şahin Çatma deyib.
Türkiyəli mütəxəssisin bu sözləri Azərbaycan voleybol ictimaiyyətində qıcıq formalaşdırıb. Prosport.Az bu məsələ ilə bağlı müəyyən araşdırma aparmaq qərarına gəlib.
Doğrudanmı, azərbaycanlı məşqçilər tənbəldirmi? Bunun üçün qadın və kişi komandaların voleybol çempionatlarına nəzər salmalı olduq.
Qadın komandaların Yüksək Liqasında çıxış edən 9 komandadan 3-nün baş məşqçisi yerli, digərləri əcnəbi mütəxəssislərdir. Və hər 3 yerli məşqçi voleybol ölkəsi olan İtaliya, Türkiyə, Braziliya və Rusiya məşqçilərini turnir cədvəlində qabaqlayır (sıralama turnir cədvəlinə görədir). Şahin Çatmanın özünün çalışdırdığı "Gənclər" komandası isə bütün görüşləri uduzaraq və xal belə qazanmayaraq mövsümü erkən başa vurub. "Gənclər" çempionatda pley-offa çıxmayan yeganə komandadır.
Qadınlar
1. "Turan" – Ziya Rəcəbov (Azərbaycan)
2. "DH Volley" – Fərid Cəlalov (Azərbaycan)
3. "Milli Aviasiya Akademiyası" – Emin Əbilov (Azərbaycan)
4. "Gəncə" – Rafael Petri (Braziliya)
5. UNEC – Covanni Torkio (İtaliya)
6. "Abşeron" – Haluk Korkmaz (Türkiyə)
7. "Azerreyl" – Paolo Tofoli (İtaliya)
8. "Murov Az Terminal" – İqor Qoloqanov (Rusiya/Qazaxıstan)
9. "Gənclər" – Şahin Çatma (Türkiyə)
Kişilərin mübarizə apardığı 6 komandalı çempionatda isə 2 yerli, 4 əcnəbi məşqçi çalışır. Yalnız "Neftçi"nin ukraynalı baş məşqçisi Viktor Bondaryevin işinin öhdəsindən gəldiyini demək mümkündür. Cəlil Cəlilovun komandası turnir cədvəlində lider olmaqla bütün əcnəbi baş məşqçilərin kollektivlərini, Cavid Süleymanovun "Ordu"su isə digər 3 əcnəbi komandanın başçılıq etdiyi komandaları qabaqlayır. Sona 2 tur qaldığından, ilk "3-lük"də yerdəyişmənin olması da mümkündür.
Üstəlik, bu əcnəbilərdən 2-si – Boris Qrebennikov və Cahangir Seyid Abbasi həm də millilərimizin baş məşqçiləridir. İran azərbaycanlısı olan məşqçinin komandası sonuncu sıradadır. O həm də oğlan voleybolçulardan ibarət gənclər və yeniyetmə millimizi çalışdırır. Boris Qrebennikov isə ötən ilin payızında Fərid Cəlalovun yerinə kişi voleybol millimizə baş məşqçi təyin olunub. "Azərreyl" isə onun rəhbərliyi altında yalnız gənc və yeniyetmələrdən qurulmuş "Gənclər" komandasını qabaqlaya bilir.
Kişilər
1. "FHN Xilasedici" – Cəlil Cəlilov (Azərbaycan)
2. "Neftçi" İK – Viktor Bondaryev (Ukrayna)
3. "Ordu" – Cavid Süleymanov (Azərbaycan)
4. "Murov Az Terminal" – Ruslan Jbankov (Rusiya/Finlandiya)
5. "Azərreyl" – Boris Qrebennikov (Qazaxıstan/Fransa)
6. "Gənclər" – Cahangir Seyid Abbasi (İran)
Üstəlik, dahar bir məqam var. Bu, Azərbaycan voleybolunda yerli və əcnəbi məşqçilərə verilən maaşla bağlıdır. Azərbaycanlı baş məşqçi aya maksimum 2 min dollar qazana bilirsə, ölkəmizə gələn əcnəbi çalışdırıcılarda bu, təxminən 5 min dollardır. Fərqi gördünüzmü? Biz qəbul edirik ki, hər ölkədə, hər idman növündə əcnəbi məşqçiyə yerlidən daha çox pul verilməsi normal haldır. Çünki onlar Azərbaycana yerli məşqçidən üstün olduğu üçün dəvət olunur.
Ancaq gətirilən əcnəbi məşqçilər də aldıqları pulun qarşılığını verməli və çalışdıqları ölkəyə öz bilik və bacarıqları ilə fayda verməlidir. Gəlib burada yerli məşqçilərə uduzmamalıdırlar.
Şahin Çatmanın çalışdırdığı millilər Avropada hamıya hər setdə böyük hesabla uduzmaqla məşhurlaşıb. 2023-cü ilin iyunundan millilərimizi çalışdıran Çatma qaşlarını çatıb fikirləşməlidir: "tənbəl azərbaycanlı məşqçilərdir, yoxsa mən?"
Mahmud