"Qol vurmaq istəyim vardı. Oyuna çıxmağı çox istəyirdim. Elə bir şans verildi, mən də onu dəyərləndirdim. İnşallah ardını gətirərik".

Bunu Prosport.Az-a müsahibəsində "Neftçi"nin futbolçusu Rəhman Hacıyev deyib.

UEFA Avropa Konfrans Liqasının Bosniya və Herseqovinanın paytaxtı Sarayevoda keçirilmiş "Jelezniçar" – "Neftçi" oyununda (2:2) 85-ci dəqiqədə Kenni Sayefin yerinə meydana daxil olmuş 30 yaşlı futbolçu 10 dəqiqə sonra komandasını məğlubiyyətdən xilas edən qola imza atıb. O, cərimə meydançasının kənarından vurduğu mükəmməl qolla "Neftçi"yə mərhələ keçmək üçün yaxşı şans verib:

Rəhman Hacıyev bundan sonra da qollarla komandasına kömək edəcəyini bildirib: 

"Tək oyunla yox, məşqlə də ən yaxşısını etməyə çalışacağam ki, əsas heyətə düşüm. İnşallah, istəyimə də nail olacağam. Çünki özümə güvənirəm. Ötən mövsüm zədəli oldum, çox vaxt itirdim. Demək olar ki, 4-5 ay zədəli oldum, məşqlərdən qaldım, formadan düşdüm. Amma bu mövsüm mənim üçün fərqli olacaq. Həm fərdi, həm də komanda baxımından "Neftçi"yə xeyir verəcəyimə inanıram".