Yeniyetmə və gənc qızlardan ibarət voleybol millimizin baş məşqçisi Şahin Çatma ilə yollar ayrıla bilər.

Prosport.Az-ın xəbərinə görə, türkiyəli məşqçiyə bu ay start götürəcək MDB Oyunları üçün son şans verilib.

Beynəlxalq yarışlarda 0:3 hesabı ilə rəqiblərə uduzması Voleybol Federasiyası rəhbərliyinin narazılığına səbəb olub. 2 il ərzində azərbaycanlı qızlardan ibarət voleybolçu yetişdirib milliyə qazandırmamasından federasiya prezidenti Şahin Bağırov narazıdır.

Ona Gəncədə keçiriləcək III MDB Oyunları üçün son şans tanınıb. Orada 15 yaşadək qız millimiz uğursuz çıxış etsə, Çatma ilə yollar ayrılacaq.

Şahin Çatma 2023-cü ilin iyunundan yeniyetmə və gənc qızlardan ibarət voleybol komandalarına baş məşqçi təyin olunub. Əgər MDB Oyunlarında uğurlu nəticə qeyd alınarsa, türkiyəli mütəxəssisə Azərbaycan Yüksək Liqasında debüt edəcək "Gənclər" komandasında baş məşqçi kimi işləməyə razılıq veriləcək.  

Qeyd edək ki, III MDB Oyunlarında voleybol yarışları 29 sentyabr – 6 oktyabr tarixlərində keçiriləcək. Voleybol yarışları Gəncə İdman Sarayında baş tutacaq.