Qadın voleybolçuların Yüksək Liqasında bürünc mükafatçı bəlli olub.

Prosport.Az xəbər verir ki, bu gün Gənclər və İdman Nazirliyinin (GİN) Voleybol Mərkəzində 3-cü yer uğrunda “Milli Aviasiya Akademiyası” və “Gəncə” klubları arasında cavab oyunu keçirilib. 

Oyuna daha yaxşı başlayan “Gəncə” 2:0 hesabı ilə irəli keçib. Lakin “Milli Aviasiya Akademiyası” təşəbbüsü ələ alaraq ardıcıl 2 seti aktivinə yazdırıb və ümumi hesabı bərabərləşdirib – 2:2. Gərgin keçən mübarizədə tay-breykdə də qalib gələn “Milli Aviasiya Akademiyası” meydandan 3:2 hesablı qələbə ilə ayrılıb. Beləliklə, hər iki oyunda qələbə qazanan “Milli Aviasiya Akademiyası” Azərbaycan çempionatının bürünc medalına sahib çıxıb. “Gəncə” klubu isə Yüksək Liqanı 4-cü yerdə başa vurub.

Qeyd edək ki, “Milli Aviasiya Akademiyası”nın oyunçularına medallar final günü baş tutacaq mükafatlandırma mərasimində təqdim ediləcək.

Yüksək Liqa 
3-cü yer uğrunda cavab oyunu
20 aprel
“Milli Aviasiya Akademiyası” – “Gəncə” 3:2 (25:27, 17:25, 25:14, 25:21, 15:12)

Kişi voleybolçuların Yüksək Liqasında isə 3-cü yer uğrunda mübarizəyə start verilib. GİN-in Voleybol Mərkəzində “Neftçi” – “Xilasedici” komandaları bürünc medal üçün ilk oyuna çıxıb. Gərgin mübarizədə keçən görüşdə “Xilasedici” 3:0 hesabı ilə qələbə qazanıb. Bu komandaların cavab oyunu sabah keçiriləcək.

Yüksək Liqa
3-cü yer uğrunda ilk oyun
20 aprel
“Neftçi” – “Xilasedici” 0:3 (20:25, 22:25,17:25) 

Cavab oyunu
21 aprel 
17:00 “Xilasedici” – “Neftçi”
GİN-nin Voleybol Mərkəzi

Qeyd edək ki,reqlamentə görə qalib 2 oyunun nəticəsinə əsasən müəyyən olunacaq. 2 qarşılaşmadan sonra tərəflər hərəyə 1 qələbə qazanarlarsa (xallar da bərabər olarsa), Qızıl set oynanılacaq.