Qadın voleybolçulardan ibarət Azərbaycan millisinin üzvləri – Yelizaveta Ruban və Olena Xarçenko “Alba”, kişilərdən ibarət millimizin hücumçusu Andrey Melnikov isə “Korona” klubu ilə Rumıniya Kubokunun qalibi olub.

Prosport.Az qaliblərdən 2-nin fikirlərini təqdim edir:

Andrey Melnikov: “Final matçı çox gərgin və emosional keçdi. Final oyunları yüksək səviyyədə təşkil olunmuşdu, möhtəşəm azarkeş dəstəyi vardı. Mövsüm artıq sona yaxınlaşır. Çempionatın finalında “Dinamo” klubu ilə qızıl medallar uğrunda yarışırıq. 1 oyunda artıq onlara qalib gəlmişik. Çalışacağıq ki, qızıl medalı biz qazanaq. Ümumiyyətlə, çempionat, iştirakçı komandalar çox güclüdür. Mövsüm maraqlı, çətin və çoxlu səyahətlərlə dolu oldu. Ümumilikdə isə bu çempionat mənə çox böyük təcrübə verdi”.

Yelizaveta Ruban: “Çox şadam ki, Rumıniya Kubokunu qazandıq. Finalda rəqibimiz ötənilki çempion idi və oyun çox maraqlı keçdi. Bilirdik ki, rəqib güclüdür və asan olmayacaq. Ona görə də ciddi hazırlaşdıq və qalib gəldik. Bu oyundan sonra istirahətə vaxt yox idi. Çünki 2 gündən sonra bizi CEV kubokunun finalı gözləyirdi. İtaliyada baş tutan ilk oyunda uduzsaq da, evdəki cavab matçına ciddi hazırlaşırdıq. Hər şey ən yüksək səviyyədə təşkil olunmuşdu, ab-hava inanılmaz idi. Finalda məğlub olmağımıza baxmayaraq, nəticədən razıyıq, turnirin 2-cisi olduq. İndi qarşımızda son və ən çətin vəzifə – Rumıniya çempionatının finalı qalıb. Əlbəttə, yorğunluq var. Lakin biz çalışacağıq ki, çempionluğu qazanaq və mövsümü daha çox qələbə ilə başa vuraq”.

Qeyd edək ki, final matçında “Alba” klubu “Voluntar”ı, “Korona” isə “Munisipal Zaleu”nu 3:1 hesabı ilə məğlub edib.