Avropa Voleybol Konfederasiyasının (CEV) AVRO-2026 üzrə Təşkilat Komitəsinin nümayəndələri və yayım hüququna malik CEV-in tərəfdaşı olan “İnfort” şirkətinin əməkdaşları Azərbaycanda səfərdə olub.

Prosport.Az xəbər verir ki, səfər qadınlar arasında qitə çempionatına hazırlıq işləri ilə tanış olmaq məqsədi daşıyıb. Qonaqlar qarşılaşmaların keçiriləcəyi Milli Gimnastika Arenasına və voleybolçuların yerləşdiriləcəyi hotellərə baxış keçirib, həmçinin bir sıra digər təşkilati məsələləri müzakirə edib.

Qeyd edək ki, AVRO-2026-da qitənin 24 komandası 4 qrupda mübarizə aparacaq. Ölkəmiz 2026-cı il avqustun 21-dən sentyabrın 6-dək baş tutacaq turnirin 1 qrupuna ev sahibliyi edəcək. Bu matçlar Bakıda Milli Gimnastika Arenasında təşkil olunacaq. Digər qruplara Çexiya, İsveç və Türkiyə ev sahibliyi edəcək.