"Milli Olimpiya Komitəsinin (MOK) İcraiyyə Komitəsinə üzv seçiləcəyimi gözləmirdim. Demişdilər ki, seçki olacaq, MOK-a dəvət etmişdilər. İcraiyyə Komitəsinə üzv seçilməyim mənim üçün sürpriz oldu. Hələ ki şokdayam".

Bunu Prosport.Az-a qadın voleybolu üzrə Azərbaycan millisinin sabiq üzvü Alla Həsənova deyib. 

Hazırda "Azərreyl"in gənc qızlardan ibarət komandasını çalışdıran A.Həsənova İcraiyyə Komitəsində idmanın inkişafı üçün əlindən gələni edəcəyini bildirib: "Bu etimada görə ilk növbədə cənab Prezidentə təşəkkürümü bildirmək istəyirəm. Yeni olimpiya tsikli başlayır. Allahdan arzum budur ki, növbəti tsikldə daha çox olimpiya çempionumuz, mükafatçımız və Olimpiadaya lisenziya qazanan idmançılarımız olsun. İcraiyyə Komitəsinin bir üzvü kimi mən də idmançılarımıza bu yolda köməklik edəcəyəm".

54 yaşlı məşqçi 2026-cı ildə Bakıda keçiriləcək Avropa çempionatına da toxunub: "Növbəti il Azərbaycanda qadın voleybolu üzrə Avropa çempionatı keçiriləcək. İcraiyyə Komitəsinin üzvü Faiq Qarayev də millimizin baş məşqçisidir. Ona görə də milli komandamıza bu yarışda uğurlar arzu edirik".

Qeyd edək ki, bu gün MOK İcraiyyə Komitəsinə Alla Həsənova və cüdo üzrə olimpiya çempionu Elnur Məmmədli yeni üzv kimi daxil edilib. Yunan-Roma güləşi üzrə olimpiya çempionu Fərid Mansurov isə MOK vitse-prezidenti seçilib.

Səbuhi Musa