Azərbaycanın 2 voleybol klubu heyətini Belarusdan olan legionerlə gücləndirib.

Prosport.Az-ın xəbərinə görə, turnir cədvəlində yaxşı vəziyyətdə olmayan son ölkə çempionu "Azərreyl"in qadın komandası Anastasiya Şupenyovanı heyətinə qatıb.

26 yaşlı voleybolçu Polşa, Rusiya, Türkiyə və Rumıniyada legioner həyatı yaşayıb. Diaqonal hücumçu olan Anastasiya Şupenyovanın karyerasında "Uraloçka", "Karşıyaka" kimi tanınmış komandalar olub. Mövsümün əvvəlində Rumıniyanın KSM komandasında çıxış etmiş Anastasiya 2021/22 mövsümündə "Minçanka" ilə Belarus çempionluğu və kuboku qazanıb. O artıq "Azərreyl"lə oyuna da çıxıb.

Hazırda çempionluğa iddialı və turnir cədvəlində lider olan "Murov Az Terminal" kişi voleybol komandası da Belarusdan Pavel Kuklinskini heyətinə cəlb edib. 1.96 metr boyu olan 36 yaşlı oyunçu əvvəllər Fransa, Çin, Qətər, Türkiyə, Yunanıstan və Qazaxıstanda legioner karyerası yaşayıb. 

Yunanıstanın PAOK və Qətərin "Əl-Əhli" komandalarında oyun təcrübəsi əldə etmiş Kuklinski mövsümün əvvəlində "Atırau"da çıxış edib. O, PAOK-la Yunanıstan Kubokunu və 2 dəfə də Belarus Kubokunun qalibi olub. Pavel Kuklinski Belarus millisi ilə Avropa Qızıl Liqasının finalçısı olub.