"6-cı Paralimpiya Oyunlarım idi. Bir az hazırlığımdan razı deyildim. Zədələr ucbatından hazırlığım istədiyim səviyyədə keçməmişdi. Bununla belə bürünc medal qismət oldu".

Prosport.Az xəbər verir ki, bunu "Paris-2024" Yay Paralimpiya Oyunlarında bürünc medal qazanan Azərbaycan paracüdoçusu İlham Zəkiyev deyib.

+90 kq çəki dərəcəsində yer alan 44 yaşlı idmançı sevinc hisslərini bölüşüb: "Paralimpiadada istənilən medal qələbə deməkdir. Çox sevinirəm, bu medalda çox insanın əziyyəti, zəhməti var – məşqçilər, məşq yoldaşları, ailə, komitə, federasiya. Hamısına təşəkkürümü bildirirəm. Çox şükür Allaha, bu qələbəni bizə yaşatdı. Yaşasın, Azərbaycan! Bu qələbəni Azərbaycan xalqına həsr edirəm. Nəhayət, biz sərhədləri tam bərpa olunmuş Azərbaycanın adından çıxış edirik. Üçrəngli bayrağımızı çalışacağıq ki, həmişə zirvələrdə saxlayaq".

Qeyd edək ki, İlham Zəkiyev 5 fərqli Paralimpiya Oyunlarında medal qazanmaqla Azərbaycanın tarixinə düşüb.