Azərbaycan Voleybol Federasiyası (AVF) prezidenti Şahin Bağırovun müşaviri Cəlil Cəfərov növbəti dəfə Avropa Voleybol Konfederasiyasının (CEV) İdarə Heyətinə üzv seçilib.

Prosport.Az-ın xəbərinə görə, AVF-nin sabiq baş katibi və vitse-prezidenti, "Rabitə" və "Telekom" klublarının keçmiş prezidenti 34 namizəd arasından seçilən 17 üzvdən biri olub.

Belə ki, 3 nəfər yeni CEV prezidenti Roko Sikiriç tərəfindən seçilib və Baş Assambleya tərəfindən təsdiqlənib. 6 nəfər səsvermənin ilk turuna, 8 nəfər isə 2-ci turuna əsasən CEV İdarə Heyətində yer almaq hüququ əldə edib. C.Cəfərov məhz 2-ci turun nəticələrinə əsasən seçilib.

Həmçinin, Roko Sikiriç CEV İcraiyyə Komitəsinin üzvlərini elan edib. İvan Knejeviç (Serbiya) I icraedici vitse-prezident, Erik Tonqi (Fransa) II icraedici vitse-prezident, Qi Jüvet (Belçika) vitse-prezident və xəzinədar, Leonel Salqayru (Portuqaliya) inzibati işlər üzrə vitse-prezident, Klodax Nik Kana (İrlandiya), Marek Royko (Slovakiya), Metod Ropret (Sloveniya) və Annika Xöbel (İsveç) vitse-prezident olub.

Xatırladaq ki, daha əvvəl 2020-ci ildə də Cəlil Cəfərov CEV İdarə Heyətinin üzvü seçilmişdi.

Onu da bildirək ki, CEV-in 6 komissiyasına azərbaycanlıların namizədliyi irəli sürülüb (həmin komissiyalara kimlərin namizəd olmasını bu xəbərdən oxuya bilərsiniz). Onların seçkisinin təxminən 1 ay sonra baş tutması gözlənilir.

Səbuhi Musa