Avropa Voleybol Konfederasiyasının (CEV) yeni prezidentinin adına aydınlıq gəlib.
Prosport.Az xəbər verir ki, 2 gün əvvəl 43 yaşını qeyd etmiş xorvatiyalı sabiq voleybolçu Roko Sikiriç qurumun prezidenti seçilib.
O, 51 üzv federasiyadan 36-nın səsini qazanıb. Bununla da Roko Sikiriç 4 il ərzində CEV-ə rəhbərlik edəcək.
Qeyd edək ki, bu gün CEV-in İdarə Heyətinə üzvlər də seçiləcək. Bu posta Azərbaycan Voleybol Federasiyası prezidenti Şahin Bağırovun müşaviri Cəlil Cəfərov namizəddir.
13:31
Bu gün Avropa Voleybol Konfederasiyasında (CEV) seçkilər keçiriləcək.
Prosport.Az-ın xəbərinə görə, İtaliyanın Neapol şəhərində baş tutacaq CEV-in 45-ci Baş Assambleyasında 7 azərbaycanlı bu qurumda müxtəlif vəzifələrə namizəddir.
2020-ci ilin oktyabrın 16-da Avstriyanın paytaxtı Vyanada keçirilmiş CEV-in 41-ci Baş Assambleyasında qurumun İdarə Heyətinin üzvü seçilmiş Azərbaycan Voleybol Federasiyasının (AVF) prezidentinin müşaviri (o vaxt baş katib idi – red.) Cəlil Cəfərov bu dəfə də həmin yerə namizəddir. Bu posta 34 namizəd var.
Bundan başqa, AVF İdarə Heyətinin üzvü Elqar Bağırovun Avropa Çimərlik Voleybolu Komissiyasına, AVF-nin baş koordinatoru Zöhrab Gözəlbəylinin Avropa Maliyyə Komissiyasına, AVF-nin həkimi Vüsalə Kazımovanın Avropa Tibb Komissiyasına, beynəlxalq dərəcəli hakim, AVF Hakimlər Komitəsinin rəhbəri Eldar Zülfüqarovun Avropa Hakimlər Komissiyasına, AVF-nin icraçı direktoru Vüqar Hüseynzadənin Avropa Qar Voleybolu Komissiyasına və AVF-nin baş katibi Faiq Orucovun isə Avropa Voleybol Komissiyasına namizədliyi irəli sürülüb.
Bunlardan Vüsalə Kazımova daha əvvəl də bu postda olub. Həmçinin, Regional İnkişaf Mərkəzinin direktoru Nərgiz İsmayılovanın üzv olduğu Avropa Kuboklar Komissiyası CEV reqlamentinə edilən dəyişikliklərdən sonra ləğv olunub. Voleybol hakimi, AVF-nin Beynəlxalq əlaqələr şöbəsinin müdiri Mixail Frişmanın üzv olduğu Avropa İdman Yarışlarının Təşkili Komissiyası isə 2 yerə ayrılıb.
Qeyd edək ki, CEV prezidenti postuna 4 nəfər namizəddir. Serbiyalı Aleksandar Boriçiçin namizəd olmadığı budəfəki seçkidə qurumun prezident postu üçün Erik Adler (Danimarka), Renato Arena (İtaliya), Roko Sikiriç (Xorvatiya) və Leşek Ventsel (Polşa) mübarizə aparır. AVF-nin namizədi bu anadək CEV-in vitse-prezidenti işləyən Renato Arenadır. O, ötən ilin noyabrında Bakıda işgüzar səfərdə olub.
Onu da bildirək ki, Baş Assambleyada Azərbaycanı AVF prezidenti Şahin Bağırov və vitse-prezidenti, qadın millimizin baş məşqçisi Faiq Qarayev təmsil edir.