Azərbaycan boksçusu Loren Alfonso bu gün "Paris-2024" Yay Olimpiya Oyunlarında qızıl medal görüşünə çıxacaq.

Prosport.Az xəbər verir ki, 92 kq çəki dərəcəsində mübarizə aparan idmançı qızıl medal uğrunda qarşılaşmada özbəkistanlı Lazizbek Mullojonovla üz-üzə gələcək.

Bu gün, həmçinin Azərbaycanın bədii gimnastika üzrə qrup hərəkətləri komandası və iki sərbəst güləşçisi mübarizəyə qoşulacaq.

Qrup hərəkətləri komandası əvvəlcə təsnifat mərhələsində halqalar, eləcə də top və lentlə hərəkətlər üzrə qüvvəsini sınayacaq.

Sərbəst güləşçilərə gəlincə, Turan Bayramov (74 kq) albaniyalı Çermen Vəliyevlə, Giorgi Meşvildişvili (125 kq) isə misirli Diaeldin Əbdülmüttəliblə qarşılaşacaq. Hər iki görüş 1/8 finala təsadüf edəcək.

Qeyd edək ki, hazırda Azərbaycanın aktivində 5 medal var. Cüdoçular Hidayət Heydərov (73 kq) və Zelim Kotsoyev (100 kq) Olimpiya çempionu olublar, taekvondoçu Qaşım Maqomedov gümüş, yunan-Roma güləşçisi Həsrət Cəfərov (67 kq) bürünc medala sahib çıxıblar. Loren Alfonso (92 kq) isə finala vəsiqə qazanmaqla ən azı gümüş mükafatı təmin edib.