AFFA yeni mövsümdən Region Liqası və Həvəskarlar Liqasını birləşdirəcək.

Bu barədə Prosport.Az-a Azərbaycan Həvəskarlar Futbol Federasiyasının prezidenti Rüfət Əmirov deyib.

O, fevralda saytımıza verdiyi müsahibədə yeni AFFA prezidenti önündə məsələ qaldıracağını bildirmişdi. Bəs, AFFA prezidenti Rövşən Nəcəflə görüşə bilibmi? Onun sözlərinə görə, həvəskarlar liqası olan hər iki turniri keçirməyin mənası yoxdur: "Rövşən müəllimlə görüşə bilməmişəm. Amma bu barədə AFFA-nın icraçı vitse-prezidenti Sərxan Hacıyevlə artıq danışmışam. O bildirib ki, bu məsələni AFFA İcraiyyə Komitəsində qaldıracaq və müvafiq qərar veriləcək. Düzdür, bizim söhbətimizdən sonra baş tutmuş iclaslarda bu məsələ müzakirə olunmayıb. Sərxan müəllim deyib ki, digər vacib məsələlər əvvəlki iclaslarda müzakirə olundu. Bu məsələ qarşıdakı iclaslardan birində müzakirəyə çıxarılacaq. Bu il qanunsuz olan Region Liqasının qalibi (Xaçmazın "Şimal" komandası – red.) Azərbaycanı UEFA Regionlar Kubokunda təmsil edəcək. Ancaq növbəti mövsümdən bizim çempionatın qalibi bu turnirdə mübarizə aparacaq".

Təqaüddə olan keçmiş hərbçi hazırda keçirilən Həvəskarlar Liqası barədə də məlumat verib: "40 komandanın iştirakı ilə yarışa start verilib. Hazırda pley-off matçları keçirilir. İyulun 28-də çempionatın final görüşü Şirvan Olimpiya İdman Kompleksində keçiriləcək. Kubokun finalı isə avqustun 4-də Ağcabədi Olimpiya İdman Kompleksinin stadionunda baş tutacaq. Əvvəl finalı Bakıda – "ASCO Arena"da keçirirdik. Ancaq bu dəfə liqaya gec start verdik. Avqustun 2-si isə Premyer Liqa yarışları başlayır deyə, finalı bölgəyə saldıq".

Qeyd edək ki, 2017-ci ildə AFFA-nın sabiq icraçı vitse-prezidenti Elxan Məmmədovun vaxtında Region Liqası yaradılıb. Həmin vaxtdan etibarən hər iki turnirdə yarış keçirilsə də, yalnız Region Liqasının qalibi Azərbaycanı Avropada təmsil etmək hüququ əldə edib.