Azərbaycan Şahmat Federasiyasının (AŞF) növbəti konfransı keçirilib.

Prosport.Az, tədbir Azərbaycan Respublikasının Dövlət Himninin səsləndirilməsiylə başlayıb. Ardınca Azərbaycan Şahmat Federasiyasının I vitse-prezidenti Faiq Həsənov ötən ilin yekunlarına dair hesabatla çıxış edib.

Federasiyanın 2023-cü il üzrə büdcə hesabatı dinlənilib və təsdiq olunub. Cari ilin büdcəsi isə müzakirə olunaraq qəbul edilib.

AŞF-nin nəzdində fəaliyyət göstərən Hakimlər, Məşqçilər, Uşaq və Gənclər, Bəstəçilik, Regional İnkişaf, Qadın və Sosial məsələlər üzrə komissiyaların 2023-cü ildə görülən işlər barədə məruzələri dinlənilib və 2024-cü il üçün planları açıqlanıb.

Azərbaycan Şahmat Federasiyasının prezidenti Mahir Məmmədov şahmat veteranlarının təqaüd proqramı barədə məlumat verib.

M.Məmmədov Azərbaycan şahmatının inkişafında səmərəli fəaliyyət göstərən Ələmdar Məmmədov, Genadi Qelman və Elmira Əliyevanı yubiley münasibəti ilə təbrik edib. Onlara AŞF adından təşəkkürnamə və 3000 manat pul mükafatı təqdim olunub.