Növbəti mövsüm idman prinsipləri qorunacağı halda, Azərbaycan Premyer Liqasına vəsiqə qazanması real görünən "Qaradağ Lökbatan"ın rəhbərliyi Bakıda stadion tapmaqda problemlə üzləşib.

Prosport.Az-ın əldə etdiyi məlumata görə, danışıqlar aparılan stadionlar Gənclər və İdman Nazirliyinə məxsus Tofiq Bəhramov adına Respublika stadionu, "Qarabağ"a məxsus Suraxanıdakı "Azərsun Arena" və AFFA-ya məxsus “Azərbaycan Xəzər Dəniz Gəmiçiliyi” QSC-nin adını daşıyan Bayıldakı "ASCO Arena" olub.

Heç kimə "Qaradağ Lökbatan"ın "Neftçi" İdman Klubu tərəfindən maliyyələşdiyi sirr deyil. "Neftçi" İdman Klubunun İdarə Heyətinin sədr müavini və İdarəetmə aparatının rəhbəri Sadıq Sadıqov da jurnalistlərə verdiyi son müsahibəsində mətbuatda yazıldığı kimi Ağsuda yox, Bakını təmsil etdikləri üçün paytaxtda oynamaq istədiklərinə işarə vurub. O bildirib ki, Lökbatandakı stadion Premyer Liqa standartlarına cavab vermədiyindən, ora təmirə bağlanacaq və klub ev oyunlarını digər arenada keçirəcək.

Lakin əldə etdiyimiz məlumata görə, yuxarıda qeyd etdiyimiz stadionlarda ev oyunlarını keçirmək mümkün olmayacaq. Çünki danışıqlar uğursuz nəticələnib.

Məsələn, "Qarabağ" tərəfi "Azərsun Arena"dan istifadə etdiklərini bildirib. Klubun direktoru Əmrah Çəlikəl saytımıza bu barədə bunları deyib: "Biz bu stadiondan məşq üçün istifadə edirik. Həm də zərurət olduğu halda, ev oyunlarımızı orada keçiririk. Yəni, bizim "Azərsun Arena"nı hansısa komandanın ixtiyarına verməyimiz mümkün deyil".

Böyük ehtimalla, klub ev oyunlarını bölgədə keçirmək məcburiyyətində qalacaq. Artıq bunun üçün danışıqların digər fazası başlayıb.

Səbuhi Musa