Ümumdünya Güləş Birliyinin (UWW) Frank Çamiso və Turan Bayramov görüşü ilə əlaqədar cəzalandırdığı 3 deleqatdan biri qurumun Hakimlər Komissiyasının vitse-prezidentidir.

Prosport.Az-ın xəbərinə görə, 2 aylıq cəza alan tunisli Kamel Buaziz məhz Antonio Silvestrinin (Almaniya) prezidenti olduğu UWW Hakimlər Komissiyasında vitse-prezident vəzifəsini icra edir.

2 aylıq cəzalandırılan Keysi Qössl və 8 aylıq cəza alan İbrahim Cicioğlu isə həmin komissiyanın üzvləridir.

Xatırladaq ki, İntizam Palatası hakimlərin bu görüşdə səhv etdiyini təsdiqləyib və referilərin cəzasını açıqlayıb. Roman Pavlov (Ukrayna) və İbrahim Cicioğlu (Türkiyə) 31 dekabradək, Ali Sayvan (İraq) 30 sentyabradək, Aleksey Bazulin (Rusiya), eləcə də Kamel Buaziz (Tunis) və Keysi Qössl (ABŞ) 30 iyunadək hakimlikdən uzaqlaşdırılıb. Bu isə o deməkdir ki, onlar Paris Olimpiadasında iş başında ola bilməyəcək.

Qeyd edək ki, bunlardan Roman Pavlov xalça hakimi, Ali Sayvan kənar hakim, Aleksey Bazulin xalça hakimi üzrə rəhbər idi. Kamel Buaziz, İbrahim Cicioğlu və Keysi Qössl isə Hakimlər Komissiyasının nümayəndələri olub.

UWW-nin araşdırma üçün yaratdığı hər iki komissiya güləş zamanı bəzi hərəkətlərin düzgün hesablanmadığını, o cümlədən güləşçi və ya güləşçilərin passivliyə görə cəzalandırılmadığını qəbul edib. Həmçinin hakimlik məsləhətləşmələrinin səmərəli olmadığı, vaxt səhvinə yol verildiyi və "çelenc" (etiraz) məsləhətləşmələrinin işində böyük nöqsanlara yol verildiyi bildirilib.